上周港股氣氛麻麻，恒指一周跌幅231點。復活節過後，一時間都好難復活。一周大事乃係長和系周四派成績表。
長實窩輪：長實（001）現價69.25元，已經去番去年11月下旬嘅水平。而日後張成績表如果見得人，有機會上番啲，否則落到67/67.50元嗰頭都似。
留意派成績表後，大股東會否增持。長實派成績表前若然跌得急，則低位撈C輪，對象係3566，6月初夠鐘，輪價27.5仙，溢價2.2%，槓桿率25.2倍（有效13.4倍），引伸波幅22.4%。兩手準備，派成績表前如果升得似模似樣，則趁低位撈P輪，對象係3697，6月下旬到期，輪價45仙，溢價4%，槓桿率15.4倍（有效9.5倍），引伸波幅21.4%。正股如果唔升唔跌，則唔做嘢，無謂揸貨蝕溢價。
和黃窩輪：炒和黃（013）窩輪，策略同炒長實窩輪一樣。
和黃如果跌，趁低買C輪，對象係3561，6月中夠鐘，輪價18.1仙，溢價4.6%，槓桿率36.9倍（有效14.7倍），引伸波幅21.8%。正股升，則低位買P輪3678，博正股再升都升唔到出乜嘢樣。3678喺6月尾夠鐘，輪價43.5仙，溢價2.8%，槓桿率16.4倍（有效9.4倍），引伸波幅22.1%。
中企P輪：國指上周跌158點，短期內都惡唔到乜樣，搵中企指數P輪短炒，對象冇乜得選擇，最靚係3580，5月尾到期，輪價13.6仙，溢價3%，槓桿率8.8倍（有效6.7倍），引伸波幅28.8%。
國壽P輪：國壽（2628）假前微升1格，係近期跌得冇咁多嘅國內保險股，趁未跌得多，揸P輪搵食，對象係3706。
章盛