世姪Ｋ三年前大學畢業，加入銀行，稍加訓練，就被派到分行做財務策劃師（financialplanner），其實即係做金融產品推銷，賣基金、賣結構性產品等等。世姪Ｋ呢三年內不斷考牌，關於保險、強積金、CFP等牌照，輪流應考。好彩佢對於讀書考試，素來叻仔，考牌冇難度，佢話佢嘅上司，四十幾歲，就慘咯，考保險牌都要考三次，因為離開學校愈耐嘅人，對考試愈係冇把握。世姪Ｋ話：「上司好有經驗，人客都好信佢，不過考牌肥佬嘅話，可能職位難保，我都戥佢着緊！」
大銀行之內，有幾千人考牌攞牌，如果遲啲金管局要財資部（主要喺dealingroom內做dealer之人）都要考牌，咁就幾乎無人不考牌，讀完MBA都冇用——唔知任志剛總裁考過乜嘢牌呢？保險、強積金、證券、財務策劃（CFP）、CFA、會計師、律師、財資人員、信託……講到你口夠。
賓架Ｐ同左丁山講：「現在銀行成為一間大學校，你叫香港人讀余光中、蘇東坡先至有嘢做，擔保有好多人成為中國文學專家。銀行為職員交學費、考試費、專業牌照費，職員考試要攞假，樣樣都係錢，相信大型銀行起碼有兩三千人考咗牌，中小型銀行都有三幾百，呢方面嘅考試、牌照支出，一年怕要二三百萬至六七百萬。支出增加唔在講，最煩係調配人手冇以前咁靈活，我做trainee嗰陣，兩年內做勻銀行所有部門，到處學習。現在未必得喎，唔少部門嘅工作都要有牌先至做得。」
讀書考牌嘅最大目的係出於「提高專業水平」嘅考慮，問賓架Ｐ：「𠵱家銀行專業服務水平係唔係好過十五年前好多呢？人客利益更受保障呢？呆壞帳更少呢？人客買各類金融產品，賺多過蝕呢？」賓架Ｐ答唔出。