蘭西噚日趁復活節假最後一日，逛九龍塘又一城，見人流唔錯，重見太古將佢個「海港整體理念」，由金鐘太古廣場搬嚟展覽，唔少人聚集參觀，有啲一家大細，家長借機教育下一代基本地理常識。
展覽場中央放置巨型維港兩岸模型，清楚睇到港九主要高樓大廈，不過重點所在，其實係西九龍文娛藝術區。場內有人幾欣賞個設計，因為夠綠化，啲流線型設計嘅住宅又幾有特色，冇咗個官方指定嘅天幕，感覺更自然靈活咁話。
雖然太古個設計，喺西九鬧劇比賽上一早叮出局，不過，純以設計出發，佢哋個理念都幾有創意，除咗喺西九龍有個容納二萬人嘅表演場地，重想擴大尖沙嘴文化中心同幫佢變身，又聘請名師法蘭克蓋瑞，喺添馬艦塊地設計五十幾萬呎博物館。聽場內介紹員講，呢個形似動物嘅博物館，靈感竟然嚟自中國山水畫嘅雲，真係有創意。
二手樓價急升，睇開樓嘅讀者都會認同，唔少放盤業主情緒極度高漲，開價一定高過市價幾成，於是，大家會問，究竟現時二手樓價合理嗎？
蘭西有次整理舊資料，搵到份九八年初青衣盈翠半島一期賣樓前，發展商搞嘅估樓價小遊戲單張（圖二），內裏列出一批屋苑當年四月份，田土廳登記造價，相信有唔錯嘅參考作用。
當時樓市不斷下滑，但以將軍澳區為例，呎價仍達五千一，相比今日炒到㷫烚烚嘅將軍澳去到四千幾，個水位重有幾多，大家心中有數吧。
唔少夜鬼都昅實，近觀塘地鐵站嘅apm商場幾時開幕，復活節前有部份店舖經已搶閘試業，新地租務部馮秀炎預計，個場過埋復活節，大概四月初，會有七成商戶開始營業，到五月正式開張大吉。
馮秀炎話，𠵱家啲舖頭係試業性質，新地未開始收租。咁即係話，享受緊免租期啦，唔知會唔會有新張大優惠呢？
蘭西初步感覺，係租戶組合年輕化、多元化同生活化，至於建築設計，就有些少太古廣場feel，幾寬敞、光猛同舒適，應該日夜都行得自在。
潮流除咗興叮人同大長今，炒樓致富亦開始成為普羅市民最感興趣嘅一環，尤其網上吹水討論區，好友淡友樓市之爭，幾乎無日無之。喺炒家大舉入市下，好多區二手樓價都有大翻身例子，即使一啲唔係炒家焦點嘅地區，亦有冷門樓業主大賺個案。
美記丘毅新報料話，西半山堅道八十九號唐樓，一千呎，業主九九年用一百萬買返嚟。
最初放盤叫價一百六十萬，後見個市係咁升，反價到一百六十八萬，外籍買家依然肯追，咁就賺咗六十八萬走人，認真和味。
電郵地址：[email protected]