陳日君噚日以天主教香港教區主教身份，第二次訪問大陸，最近又有政治雜誌爆料，話曾慶紅舊年原來已經請過民主黨前主席李柱銘上北京訪問。民主黨主席李永達同八方講，舊年的確有好多人搵佢哋返內地，例如有人叫過副主席何俊仁返廣東鄉下探吓親、認識吓祖國，但今年阿董下台後，內地特別緊張，搵民主黨嘅各方人馬亦冇咁頻密。
何俊仁話，自己之前冇應邀返廣東鄉下，係因為對方並非應承發還回鄉證畀佢，只係辦個一次性回鄉證件，咁就冇謂啦。
至於話曾慶紅搵馬丁北上訪京，馬丁話唔會評論呢則消息，但就話內地各方不同層次嘅機關，都試過請民主黨中人到內地。講開又講，逢節日必外遊嘅馬丁竟然喺今個復活節留港消費，八方都好出奇，佢話因為個寶貝仔病咗，所以陪住個仔唔出埠。馬丁不愧係廿四孝老竇，內地下次不妨請馬丁位公子訪京，咁馬丁一定陪埋去。
傳真︰2623-9278
電郵︰[email protected]