濕度日日高達95%，加埋落雨天氣，令人周身唔舒服。屋企做足防潮工夫的同時，有無發覺冬天買下的毛毛拖也開始變得濕𣲷𣲷，呢個時候就要買對通爽的蓆面拖，實行幫拖鞋換季！市面除了蓆面拖適合濕熱天氣外，還可以選擇防水膠拖，若連拖鞋都要靚過人，最啱就喺選購七彩繽紛的人字拖喇！
記者：梁彩燕 攝影：副刊攝影組
模特兒：Katie
人字拖
有五千年歷史
唔講唔知，喺5千年前，古人類就識得將獸皮、草紙同棕櫚葉等材料綁喺腳掌，成為咗人字拖的雛型！人字拖蹤影遍及全球，巴西更將之列為「國鞋」，同麵包、牛奶、咖啡豆等都並列為必需品，其概念則源於日本人的木屐，喺1962年人字拖的熱潮就由巴西傳到西方。
蓆面拖
通爽舒適
濕𣲷𣲷的天氣實在令人納悶，返到屋企第一時間梗係要畀對腳唞唞氣。以下介紹的蓆面拖鞋，是濕熱天氣的最佳選擇，雖然款式唔及人字拖奪目，但勝在夠舒適，是講求實際、舒服人士的首選。
Snoopy滑浪
夏天將至，打工仔唔可以日日放假去沙灘玩滑浪，不妨買呢對蓆拖望梅止渴！Snoopy着住紅褲仔滑浪的日子係人都嚮往，布面又印上鮮豔花花圖案，充滿日本風情，SnoopyFans實鍾意！
售價：$69c
新款兒童拖
剛推出的兒童拖鞋，布面上繡上象徵和平的紙鶴，配上醒神的橙色，夠晒Sharp！蓆面更加入顏色點綴，擺脫拖鞋的低調感。
售價：$19.9a
長興直條子
直條圖案襟睇唔易Out，配埋棉質布面令人感覺舒服，鞋踭位繡上可愛的狗仔圖案，成熟中帶點稚氣！
售價：$39.9a
睡衣款夠Warm
呢款蓆拖的鞋面，設計到好似一件睡衣，感覺好Warm。以斜紋布圍邊，棗紅色鞋面上釘咗兩粒假鈕，鞋床則以一排排的竹蓆組成，通風度夠晒高。
售價：$29.9f
送埋兩條毛巾
有公仔陪伴可以令人心情開朗啲，呢款蓆拖，彩藍的格仔上印滿了可愛的小貓和小魚，最討女仔歡心。隨拖鞋更附送兩條棉質手巾仔，夠晒實用！
售價：$29.9e
人字拖
靚到可以着出街
人字拖最大的特性，就係疏汗通爽唔焗腳，雖然大部份都係以塑膠為主，但亦有藤製的款式同防水真皮款。論款式，一定係眾拖中最突出者，花款多多，顏色又搶，着拖落街都唔會失禮街坊。
馬騮頭至搶
呢款PaulFrank人字拖，款式贏晒。將左右腳拼埋一齊，大大個馬騮頭就會呈現眼前。旁邊更有很多個細小PaulFrank點綴，夠晒生氣。
售價：$128b
設計大膽
螢光色塑膠拖，質料軟熟，鞋面上大膽印上「Make」同「Love」字樣，翻開左右鞋底一望，微微凸起的膠字重叫你「PleaseSex」㖭！創意同膽量十足！
售價：$68h
返屋企着草
質料最特別，採用草條編織而成，質地較粗糙，着落尚算舒適亦唔太拮腳。款式較罕有，潮仔潮女大可用嚟襯衫着出街！
售價：$85j
奪目民族少女
長今熱直踩夏日，Rider食住個勢推出呢款印有類似穿上大韓民族服飾的少女圖，旁邊襯托奪目的星星圖案，型！
原價：$59
特價：$41i
港式懷舊廣告
本地家居品牌住好啲出品，設計港式又夠潮。膠拖以舊式廣告做Pattern，好讓男女老幼都一齊懷緬吓七、八十年代的登報廣告！
售價：$80j
最有日本Feel
香港人一向崇尚東洋風，拖鞋鞋面鋪滿啡黃色相間的圖案，望真啲，其實係用PaulFrank的頭形砌成，軟膠質料同軟熟幼鞋帶設計，着得舒服。
售價：$180b
全防水真皮拖
BERLIN防水軟皮拖鞋，以德國特級軟皮製造，皮面經過防水處理，平均只得半磅，輕身又舒適，矮踭設計，方便襯衫！
售價：$79-$129d
暗花款式玩低調
Quiksilver新季之作，鞋面只印上暗花圖案，以泥黃色作主調，低調得來唔太花巧，唔鍾意太Colorful的男仔啱晒。
售價：$90b
膠拖
愈出愈講究
平平哋買對膠拖喺屋企粗着，都可以好講究。市面有些膠拖具抗菌防臭功能，啱晒夏天穿着，部份更附有具按摩功效的大小膠粒，設計一啲都唔馬虎。
膠粒按摩有利脾胃
拖鞋上分布了不同大小的膠粒，對腳板進行唔同程度的按摩。而近腳心位置的膠粒特別大，長期按壓對胃、十二指腸及胰臟均有利。麻布面較挺身，鞋底較厚，着得舒服。
售價：$69c
可調校鬆緊
Esprit膠拖，鞋面的魔術貼可用來調校鞋頭的鬆緊度，鞋床則鋪滿軟膠珠粒，能發揮輕微按摩功效。適合一些未能適應專業按摩拖鞋，但又想消除疲勞的人。
售價：$39.9c
膠粒啱腳形
呢款膠拖的鞋床，分布了不同大小及高低不一的膠粒，特別切合腳形。日式棉布配襯圓波點圖案，加埋青綠色調，感覺清新宜人。
售價：$29.9a
抗菌防臭
日本Charming健康拖鞋，款式雖略為老土，但軟膠質地夠舒服。備有抗菌同防臭作用，唔會焗出異味同滋生細菌，至啱講求衞生的家庭。
售價：$49.9a
獨特設計唔易甩拖
呢款膠拖帶點土味，但卻具備細心的設計。鞋床位有不同的凹凸位，行路時就唔容易跣位「甩拖」！鞋底偏厚但質料卻超輕，雙腳絕無負擔！
售價：$10.5f
Q版米奇美妮
迪士尼卡通人物一向受歡迎，加上今年迪士尼開幕，台柱米奇老鼠同女朋友美妮當然最受愛戴！呢款印有Q版米奇美妮的發泡膠拖，濕水後亦好快變乾，交叉搭帶設計，可愛趣致。
售價：$39.9g
售賣點
a 吉之島 28846888
鰂魚涌康山道2號康怡廣場南3樓
b 西田百貨 26941111
沙田新城市廣場3期2樓
c 崇光百貨 28338338
銅鑼灣軒尼詩道555號
d 裕華國貨 23840084
彌敦道301至309號
e 永安百貨 27106288
彌敦道345號永安九龍中心
f 實惠 26638833
彌敦道610號荷李活廣場1樓全層
g Trendyland 28821013
銅鑼灣駱克道537號地下
h LCX 31023668
尖沙嘴海港城海運大廈3樓
i RoyalSportingHouse 22657293
九龍塘又一城L2,235號店
j G.O.D. 28905555
銅鑼灣禮頓中心2樓全層