正所謂聞戰鼓思良將，上個禮拜六法國喺世界盃外圍賽主場被瑞士悶和，令眾法蘭西躉好生失望，唔少輿論重講緊如果施丹仍在陣，應有另一番景象。賽後翌日，施丹喺法國雷恩踢咗場慈善賽，正當佢享受行善積德，唔知會唔會為國家隊低沉感到一絲難過？
假如法國有佢壓陣，多個靈魂人物點都會好番啲，不過咪話我求大俠潑冷水，莫講話佢唔慌會復出，就算會家陣隊波最大問題係無鬥心，並唔係佢復出就一定改善到；要難過嘅點計都未到施丹，而係未能夠帶起班波嘅教練杜明尼治。
人人都有選擇自由，施丹報國多時而睇見隊波唔多妥，選擇退出無可厚非。法國足球唔可以成世靠一個人，調整期係每隊波總要面對嘅命運，睇見一代球王咁享受人生，真正法蘭西躉應該戥佢開心至啱。
車路士領隊摩連奴日前訪以色列一間青少年足球學校，同以巴青年一齊踢波，宣揚和平訊息。摩連奴重話今次到臨聖地，尋回足球最真實一面，顯得非常謙卑，唔似得喺球壇咁，每個人都覺得自己角色都重要。老摩今季開金口幾乎每次都帶挑釁性，今次咁謙虛有禮，真係少見。
克羅地亞網球手盧比錫今年表現奇佳，三個月內四度晉身ATP賽事男單決賽，法國球手羅達表示為咗沾染佢嘅旺氣，竟然喺星期日嘅比斯開爾網賽前，剝光豬匿咗入盧比錫嘅更衣室入面，嚇咗盧比錫一跳。不過羅達呢招又真係有效，因為佢真係喺之後嘅男雙首圈順利過關！
我求大俠日前咪話英格蘭喺星期三主場迎阿塞拜疆時嘅目標係要大勝對手，入球多多益善；咁英國《太陽報》就好識搞噱頭，佢哋話如果阿塞拜疆嘅龍門卡曼倫高喺星期三時每失一球，佢哋就會送一隻喺阿塞拜疆代表財富嘅耗牛畀卡曼倫高，減輕佢失球嘅痛苦咁話喎，咁都得？
其實喺剛過去嘅禮拜六、日，非洲都有好多場○六世界盃外圍賽上演，而且戰果同樣正路，強隊全線喺主場贏波，包括埃及、尼日利亞、喀麥隆同埋象牙海岸等，入波嘅重係香港球迷熟口熟面嘅球員好似美度、簡奴同杜奧巴等。話時話，馬會有冇考慮開埋非洲區外圍賽，益吓球迷呢？
逢周一至周五見報