理想家居：<br>出租家具任配搭租夠兩年歸自己

租家具呢個服務聽落可能你會覺得不切實際，的確，長租家具嘅主要客戶對象並唔係本地人，而係一班需要嚟香港長期公幹嘅外地人、需布置示範單位嘅發展商、或者係電影公司、廣告公司。不過原來經營出租家具的HomeEssentials，除出租外，重不時會有家具以筍價發售，而且只要幫襯租家具滿兩年，嗰件家具就會正式屬於租客所有，計落需要付出嘅金錢跟以正價購買差唔多。無論係想試啱先買，又或者係隨時變心一年換幾次家具嘅花心屋主，嚟呢度租家具就啱晒喇！

記者：江聰　攝影：陳智良　Model：Bonny（D8）

HomeEssentials主要嘅租客係外籍人士，但出租嘅家具反而係以充滿中國傳統風味為主。HomeEssentials總裁艾兆年先生就話：「因為有好多嚟本港公幹嘅外籍人士都好鍾意中國文化，所以有唔少客人都喜歡將家居布置得比一般港人家居更有中國特色。」外籍人士喜歡中式家具唔算新奇事，難得係艾兆年話中式家具亦有唔少本地年輕一輩捧場，對仿古中式家具更加係趨之若鶩。

■想拼砌出一間充滿中式風味嘅睡房，只要每月支付家具售價嘅5%作租金就可以。(QueenSize床$2,650、床褥$6,800、頭枕$2,300，床頭櫃$2,000)

■當然唔少得中式客廳Setting，坐喺廳中泡茶別有一番風味。(三座梳化$18,000，兩座梳化$10,000，木茶几$3,500，電視櫃$6,800)

■中式矮櫃，裝飾多於實用，如果係長期租客，可租埋櫃上嘅裝飾品。$4,000

■大衣櫃經過改裝之後變成一個電視櫃，可收納一部29吋屏幕電視機。($7,200)

■飯枱設計簡單得嚟有性格，木椅座墊上嘅金線繡花更能貫徹中式風格。(飯枱$11,500，木椅$1,400/張)

■呢個矮櫃似藥材舖中嘅百子櫃，間隔分明非常實用。($6,800)

HomeEssentials嘅中式家具仿古味濃，但其實全部都係新製品，主要係自行設計生產或從中國採購到港，而且大部份以柚木製造，配上金屬扣環，充滿古董風味。為迎合不同口味嘅客人，HomeEssentials亦有較簡潔、適合現代家居使用嘅家具出租。
而且家常電器如電視、DVD機、座枱燈、微型音響等，HomeEssentials都有提供出租服務，更擁有不同尺寸供選擇。

■呢個客廳Setting就可以提供一個簡約清新嘅空間，供用家舒舒服服休息一下。(音響櫃$7,000，黑色梳化椅$6,000，黑色座墊$4,000，地氈$4,000，微型音響租價$200/月)

■較大型嘅客廳，基本上梳化會以用料及座位數量而定價，真皮梳化會較貴。(兩座位梳化$9,700，單座梳化$4,800，茶几$3,000，電視枱$4,200，29吋電視租價$300/月)

■服務體貼，連鋼琴都可以租用，放喺客廳中，感覺更高格調。(三座位梳化$10,500，藤枱$5,200，鋼琴租價$600/月)

到HomeEssentials租家具，基本上分為長期或短期兩種租約，超過1年嘅謂之長租，每月租價會係家具本身售價嘅5%，而且只要租滿24個月，加上租前已付嘅10%按金，該件家具就正式屬於租客。長期租用嘅家具全部都係全新家具，款式選擇多，重可以要求HomeEssentials提供室內設計服務，為整個家居度身設定租家具套餐，包運送費用，方便又易計數。

■呢張藤製梳化床上最啱放喺窗邊，配合淡淡陽光透射，感覺夠晒懶洋洋。($4,300)

■喺極具古舊感嘅梳妝木枱前化妝，真係好有古典美人嘅感覺。($4,200)

短期租客所租到嘅，主要係專門為短租而設嘅舊家具，HomeEssentials稱短租家具為「流動酒店服務」，即公司會提供一整套家具給客人使用，不過就未必係全新，因為大多數短期租客都係因為新購家具未運到而租家具頂替一段短時間，所以租客就有好似租酒店房一樣，租期後冇手尾跟，有專人運送家具暫用。當然短租客戶亦可選擇全新家具，不過價錢就比長租客戶較貴。

■唔鍾意中式風情，玻璃飯枱配襯金屬製嘅座椅及燭台，歐陸感覺即時顯現。(飯枱$4,800，椅$2,000/張，燭台$1,000，櫃$3,600)

HomeEssentials
地址：鴨脷洲利榮街2號海怡工貿中心22字樓7-14室
電話：28701400

■大型實木飯枱加木椅，足可容納8人同枱食飯，招呼多幾個朋友都唔成問題。(飯枱$12,000，木椅$2,400/張)飯枱上一套混合中西特色嘅餐具屬非賣品，只限租客租用。(租價：$50/月)

理想家居：出租家具任配搭租夠兩年歸自己

理想家居：
出租家具任配搭租夠兩年歸自己