前特首夫人董趙洪娉身兼八十幾個公職，但董生突然唔撈，正所謂「人一走、茶就涼」，無論董太係咪願意，佢都要逐步淡出公職服務，好似紅十字會會長呢個位，董太最近就已經向紅十字會請辭。
身為紅十字會主席嘅楊鐵樑爵士，證實已經收到董太嘅辭職要求，亦將會批准。紅十字會贊助人係特首，而會長呢個位，按慣例會預留畀新特首夫人，如果七月曾蔭權喺特首選舉中大熱「當選」，新紅十字會會長就係曾太鮑笑薇。
睇番資料，雖然傳統上回歸前都係由港督夫人出任紅十字會會長，但中間都有幾任「斷纜」，包括前港督尤德、衛奕信、彭定康等嘅太太，都冇做紅十字會會長，但到咗董建華任內，又恢復番呢個傳統。
傳真︰2623-9278
電郵︰[email protected]