波蘭前晚喺世盃外圍賽贏阿塞拜疆八比○，原來係佢哋史上贏得最多嘅一次；而同組嘅英格蘭見佢哋數得咁過癮，聽講喺嚟緊幾日嘅練習會狂練射門，務求喺禮拜三入多過八球。
英格蘭見波蘭質素咁一般都可以喺阿塞拜疆身上入到八球，佢哋係一線球隊，於是有傳佢哋上層落咗「入波令」，要佢哋禮拜三喺聖占士公園對阿塞拜疆時，唔止全取三分，重要入得多過波蘭。
英軍喺禮拜一復操之後，唔止碧咸、林柏特同奧雲等中前場球員會集中火力練射門，連後面班球員好似李奧費迪南同泰利咁，都要練埋一份；實行全民皆兵，向目標價九球進發。
雖則英格蘭作客阿塞拜疆只曾小勝一比○，但班波狀態唔錯，啱啱喺贏咗細佬北愛爾蘭四粒，加上目標又咁明確。唔使我求大俠講，相信大家都識得喺呢場強弱懸殊嘅比賽，買番個「主其他」波膽。
英格蘭前鋒朗尼嘅未婚妻高蓮，偷偷地同班朋友去西班牙玩同𠝹仔，點知樂極生悲，喺間吧飲大兩杯，結果同十條西班牙妹打起上嚟。朗尼早前被踢爆曾經成日召妓，早幾日前又畀人話佢喺間吧打個愛華頓球迷，𠵱家高蓮衰埋啲嘢同佢一樣，唔怪得英國傳媒話佢哋天生一對啦！
英超聯球會車路士近排黑過墨汁，除咗畀歐洲足協同埋英格蘭足總告之外，先排因骨折而唞咗六個星期嘅荷蘭快翼洛賓，喺上個禮拜六場世盃外圍賽畀羅馬尼亞門將拿邦特踢傷小腿，情況都幾嚴重，重有可能提早收「咧」㖭！睇嚟佢哋老細阿巴莫域治要搵個風水師傅返嚟睇睇至掂。
派路上周六上下半場各入一個死球，協助意大利擊敗蘇格蘭，呢位AC米蘭中場可謂威到盡。國家隊教練納比一向鍾意迪羅斯多過派路，不過經此一役可能會唔同晒！話時話，派路有今日應該多謝巴治奧，因為當年喺布雷西亞，對方將死球絕技傳晒畀佢，唔係點會咁醒吖？
爵士教頭史龍噚日帶領球隊贏咗公鹿，為佢帶嚟執教二十季以來的第九百三十九場勝仗，更加超越咗前塞爾特人傳奇教練歐巴治成為史上第六；不過講到總冠軍數目，兩人就差天共地，因為歐巴治攞過成九次總冠軍，反而史龍到𠵱家都「指上猶虛」，相信都係一大遺憾。
逢周一至周五見報