世事無奇不有，民政署竟然刊登招聘廣告，申請截止時間係三月二十九日，但返工時間就係四月中，時間非常緊逼。以政府一般請人程序，邊會有咁快就可以拍板請到人兼且上工㗎，假如合格人選已有工作，辭工都趕唔切啦？獵頭Ａ睇到呢段廣告，就懷疑政府已有內定人選，賣廣告只不過係例行公事啫。
先講請乜人。呢位臨時工，合約期六個月（四月中至十月中），月薪十一萬元；職銜係民政署助理署長（特別職務），職責係負責策劃、舉辦大型慶典及特別職務，講實在啲，就係籌辦「七一」、「十一」兩個大慶典節目。有乜資歷要求呀？大學畢業，二十年工作經驗，有五年做高級管理職位，曾籌辦全港性或國際大型活動。
呢項資歷條件未必個個有，投資推廣署署長盧維思就最啱，佢人工高過十一萬，當然唔肯制，佢位前手下伍展明都怕啱噃，不過伍先生已經喺三月二十四日去咗中文大學返工做傳訊總監呢！
呢類屬於公關界所講嘅eventsmanagement嘅工作，最啱出身電視台、電台嘅人去搞，例如香港電台電視部主管阿新哥就冇得彈，但新哥位高權重，點肯制呀，整個政府有十六萬多名公務員，竟然搵唔到一個人肯制，於是惟有公開招聘，邊個想做短癮臨時高官嘅，大可申請。
計我話，只做六個月，人工唔算特別好，有資格嘅人一定唔申請，最啱退休不久之合資格人士，但入到政府，孤掌難鳴，想郁動官僚架構幫手，好難咯。其實最好嘅方法就係將「七一」、「十一」慶典工作外判畀公關公司，六十六萬元外判費，勉強可以做得到，譬如公關大姐大以前做遍五台山，監製大騷無數，冇一次甩拖，屬最佳人選之一。