二五之爭，將律政司司長及政制事務局局長一對男女，擺上政治祭壇！堂堂高官，焗住要講違背良心說話！梁愛詩係親中陣營出身，共產黨大話講慣，冇乜出奇，可憐史提芬．林，係港大畢業兼政務官，九七之後，揀咗留低「服務」，以為執到支好籌，政制事務局冇嘢做，點知一係唔發市，發市就一定要做戈培爾！
林局長又講嘢嘞！佢話特區民意，經已「接受」咗曾爵士做兩年，而特區政府，就會喺好獨特嘅情形之下，先至尋求「釋法」！
點樣「獨特」法？八年未夠，「釋法」經已係第三次，證明一部所謂《基本法》，千瘡百孔，根本係一部錯漏百出嘅小學生習作！呢樣當年又顧唔到，嗰樣當時又未識咁諗！當年自吹自擂，話《基本法》係民族智慧嘅結晶，講到天花龍鳳，今時今日，證明係大話精！
咁嘅劣質「法律」文件，漏洞處處，好似一件爛衫，補都冇得補，將來「釋法」，直到二○四六，大大話話重要三四十次！每一鑊「釋法」，就在國際間出一次洋相，所謂高度自治，變咗高度不治，試問啲國際資金，點會來到一個咁兒戲嘅中國沿海普通城市投資？貪佢租金貴？貪呢個地方啲英文半桶水，夠晒中國特色，定係貪呢個地方東方紅，太陽升，出過一個獨一無二嘅董公公？
「民意」接受兩年，就可以法治過骨？咁咪即是公審？唔通「民意」可以代表法律？若然係，前年五十萬人大遊行，民意夠一致要求董公公滾蛋落台，點解廢董又唔「依法」即時辭職，要拖到今日，在胡曾輪番訓斥之下，先至變相炒魷？
特區到咗一個指鹿為馬嘅時代！陳偉業講得冇錯！冒犯？冒犯咗邊個？林局長俾陳偉業「冒犯」，香港市民嘅智慧，更係俾廢董及林局長多次冒犯，「大嚿」可以逐出場，而廢董亦終於要焗住自行離場，聲稱香港一冇法治，就會自動唔撈嘅林局長，唔知幾時落場？事實證明，政制事務局呢個位，好似「特首辦主任」以前林光光嗰個「高職」，完全係可有可無，林局長法律界出身，都係時候好似佢位同宗咁，搵番個女大狀紅顏知己，十指緊扣共遊吓六本木，保住自己個人清譽，借啲緋聞辭埋職，好過留低做香港歷史罪人。
傳真︰2623-9278
電郵︰[email protected]