患上肝癌的羅家英日前到內地橫店為劇集《方德與苗翠花》試造型，他更擺出金雞獨立甫士，精神奕奕。家英哥昨日表示與女友汪明荃（阿姐）下月到京都賞櫻花後，八月會再偕阿姐坐遊輪環遊歐洲一個月，笑言：「人一世物一世，要花吓錢，整劑杰杰哋！」
羅家英雖然患上第三期肝癌，但日前他仍到內地橫店為即將開拍的三十集新劇《方德與苗翠花》試造型，劇中飾演苗翠花父親苗顯的家英哥，鬼馬地擺出金雞獨立姿勢，甚具功架。
家英哥昨日接受本報長途電話訪問，問到其健康狀況時，早前曾接受癌細胞切割手術的家英哥在電話中說：「幾好，係傷口有啲痛，入面未好得番晒，要小心啲，所以基本上都唔會拍打戲。」
家英哥表示早已計劃在下月一日愚人節當日與汪明荃同到京都賞櫻花，逗留一個星期後，再返橫店拍攝《方》劇，等六月拍竣，他便在八月再偕阿姐上遊輪，環遊歐洲各地一個月，緊接在九月底開拍楊紹鴻監製的國產版《白色巨塔》。
家英哥笑說：「我八月會同阿姐坐船去歐洲，去吓西班牙嗰啲地方，人一世物一世，應該玩吓，要花吓錢。之前去埋啲地方濕濕碎碎，好似泰國咁，我未去過歐洲，整劑杰杰哋，畀自己休息吓。」早前有傳家英哥與阿姐將於京都結婚，這次歐遊更似足度蜜月，難怪二人結婚消息甚囂塵上。
《方》劇監製楊紹鴻昨日亦在電話中說：「家英哥到橫店之後，阿姐電話即到，不過我唔知內容，佢重請咗一個女助手，幫佢洗吓衫、煲吓湯，家英哥都有買魚同紅蘿蔔煲湯，佢情況幾好，遲啲會幫我拍多個劇㖭。」據知楊紹鴻九月開拍的四十集《白》劇，暫定演員有馬景濤、陳秀雯、蘇永康、林志穎、恬妞和伊能靜等，斟洽中的更有內地影后劉曉慶。
採訪：朱倬誼
