嘉里建設舊年賺咗十九億元，大升四倍，破咗上市以嚟嘅紀錄，一班董事分紅自然「和味」，翻閱嘉里最新年報，最高薪酬嘅高層職員，○四年度獲分花紅有成二千五百幾萬，比○三年度嘅九百萬，多咗一點八倍。
薪酬方面亦加唔少，○四年度最高薪酬嘅兩位董事酬金超過九百五十萬元，另有一位董事薪酬逾八百五十萬元，對比○三年度，最高薪嗰位高層頂多都係攞六百五十萬元，加幅約五成。
之前有人估前年八月升任做嘉里董事長嘅洪敬南，係最高人工嗰位董事，至於另一位就估係嘉里「橋王」、負責香港地產業務嘅何述勤。
不過，計八方話，係邊個都唔緊要，最緊要係希望各位老闆參照大企業嘅加薪幅度，咁打工仔就最happy啦！
傳真︰2623-9278
電郵︰[email protected]