「大佐！唔該一杯玫瑰花茶！」「豆丁愛德，最新嗰期《鋼煉》放咗去邊處呀？」
香港首家Cosplay茶館「漫畫堂」今日正式開業，除了漫畫任睇，打正旗號以動漫角色扮演者做招徠，新張期內惠顧首一小時每分鐘一毫！雖然最低消費2小時，但有得指使喜愛/討厭的動漫人物為你斟茶遞水，都是賞心樂事呢！
記者：陳慧敏 攝影：梁細權
招募直擊
見工坐定定
前面兩個見緊工，後面一排人已經急不及待喺度揭雜誌，研究東洋Cosplay術。
面試日動畫人物齊上身
以Coslayer服務生作招徠的「漫畫堂」大搞招聘會，過去一星期，有50位應徵者參加面試，他們不但變身漫畫人物，更帶齊過去Cosplay過的百變造型照、Cosplay履歷，現場除了考Cosplay同動漫常識外，還要即場耍兩招，扮埋所演人物的招牌動作。
應徵者的Cosplay衣服除了度身訂做外，為了扮得更唯肖唯妙，或者獨一無二，更加會親手縫製，好些演過幾款動漫人物的，家中幾套存貨之餘，扮起嘢嚟一時斯文捧餐，一時紮馬擺Pose，十足人格分裂！
5位服務員逐個睇
阿Wing（15歲）
Cosplay歷：半年
曾扮演：中蔚、艾梅from《鋼之煉金術師》
現扮演：大佐from《鋼之煉金術師》
「好多動漫角色啲劉海都長過眼，我專登留咗好耐，結果阿媽嫌嬲幽，夾硬要人剪短晒佢，激死！」
阿紫（15歲）
Cosplay歷：1年
曾扮演：大佐及愛德華from《鋼之煉金術師》；不二及忍足from《網球王子》；Lfrom《死亡筆記》等十多個角色。
現扮演：愛德華from《鋼之煉金術師》
「我都唔係好記得自己扮過邊幾個喇……」
千奈
Cosplay歷：3年
曾扮演：阿芝from《日式麵包王》、瑪琪from《通靈王》、瑪莉薇莎from《毒伯爵該隱》、Merokofrom《星河滿月》等等
現扮演：月乃from《日式麵包王》
「因為鍾意啲角色，所以就想扮。」
Gillian（16歲）
Cosplay歷：半年
曾扮演：Gothic少女only
現扮演：Gothic少女
「件衫我自己設計自己縫㗎！整咗成個禮拜，拆咗3、4次先成功㗎！」
紫薇（21歲）
Cosplay歷：半年
曾扮演：武裝侍女from《武裝侍女》
現扮演：武裝侍女from《武裝侍女》（自創遊戲角色）
「我之前出開同人誌㗎！啱啱同少佐讀咗個時裝設計課程，打算學整衫喺度賣！」
設計師少佐
「我哋重整緊隻Game《武裝侍女》，大家多啲上嚟留意吓支持吓啦！」
Cosplay活動大本營
店主有漫畫界的劉先生及梁先生，又有曾任飲食記者的阿肥：「我鍾意食嘢，佢哋就鍾意動漫畫，湊埋一齊，咪就係呢間舖囉！而且如果可以多一個地方，畀班Cosplayer搞搞活動，交流多啲心得，都係件好事吖！」將來，教開畫漫畫的「漫畫堂」活動一籮籮，例如堂內會有一些收費或免費的，有關Cosplay服裝、化妝及道具製作等技巧的座談會及講座；遇有大時大節就搞搞CosplayParty之類的活動；而嚟緊正密謀與ComicWorldHK20合作，於8月推出ACGCosplayer劇場，等眾Cosplayer發揮創意，想睇睇《死亡筆記》中的流克，遇上《鋼之煉金術師》的阿爾會怎樣，就要報名看看喇！初步還構想，為劇場得獎者在《漫畫堂》安排一場CatwalkShow，似足後夜祭呢！
欲知ACGCosplayer劇場詳情，請往 http://www.cwhk.org/cwhk/php/CwMainPage.php
老闆創作新款小食
話明係集Cafe跟漫畫屋於一身的茶室，舖裏除提供一般飲品小食外，還會陸續推出一系列特色小食，甚至HomeMade蛋糕，其中「鋼煉之寶」及「海龍翅杯」，都是老闆之一阿肥獨家創作。「鋼煉之寶」拼盤有黃金魷魚、翡翠螺、煙鴨胸肉、工菜帶子裙邊及蟹子鮑魚；各款花茶（如玫瑰、蘋果、薰衣草等）$25起。
客人都好癲
訪問當日，遇着《鋼之煉金術師》客人組出完Function上來參觀，可能因為周圍都係Cosplayer，佢哋不停影相之餘重愈玩愈癲，當然都要捉佢哋嚟問幾句啦！
《鋼之煉金術師》客人組（左起）：
大佐小星（Cosplay歷：2年）
「如果可以加多幾部電腦上埋網就重好！」
愛德華小幽（Cosplay歷：8年）
「確係多咗個地方畀Cosplayer聚吓，不過我諗我平時唔會專登着晒Cosplay衫上嚟囉，去完活動就可能嘅。」
雲妮小淇（Cosplay歷：7年）
「我覺得呢度夠闊落，都幾舒服吖。」
漫畫堂
優惠價：優惠期內happyhour（3:00pm-5:00pm）首一小時$0.1一分鐘，最低消費2小時，第2小時必須叫餐，最平奶茶餐$20（已包1小時收費），即最低消費為$26。
正常收費：$15/小時（會員）；$18/小時（非會員）
地址：九龍彌敦道577號高氏大樓2樓A室
電話：23321089
網址：www.gcomics.com
營業時間：星期一至四12:00nn-12:00mn；星期五及六12:00nn-2:00am；星期日12:00nn-1:00am
日本侍女茶室開先河
其實，在日本這類CosplayCafe流行甚久。01年全國擁有7家Cosplay服專門店的COSPA，就在涉谷開設了CureMaidCafe，因為主題是Maid（侍女），所有女侍應都只作侍女裝扮招呼客人，卻因此大受歡迎。自此，不同類型的CosplayCafe相繼湧現，有些還會每周轉換不同動漫主題，在涉谷區蔚為風潮。
白雪公主Cosplay始祖
Cosplay（角色扮演）在港大概只有不到10年歷史，有說50年代迪士尼找真人扮演白雪公主，是為Cosplay始祖。然而日本Cosplay始於70年代，75年長篇電視動畫《宇宙戰艦大和號》大受歡迎，高中跟大學的動漫研習社就想出在文化祭時，扮演喜愛動漫人物來吸引新血，結果大家愈扮愈過癮。今日的Cosplayer不再是漫畫展附屬品，反而好多都只是純過扮嘢癮，但就成為GameShow、漫畫或玩具展的必然項目。