自從上年秋天爆出宋承憲、張赫等韓國巨星逃兵役醜聞之後，唔少韓國男星都準備喺今年入伍，而現年二十七歲嘅靚仔元斌，亦有傳聞佢會喺今年十一月服兵役。元斌之前話過好想喺入伍前再拍一部作品，不過就未決定拍戲定拍劇集好。而早前佢同男星申河均合演嘅電影《天使的印記》，下個月就會喺香港上映，呢套戲有可能係元斌入伍前最後一部電影。
同元斌嘅前作《太極旗飄揚：生死有情》一樣，佢喺《天使的印記》入面亦係做人細佬，不過今次佢演嘅細佬性格反叛，鍾意撩事鬥非，而天生兔唇嘅哥哥就係學校模範生，自小深受母親愛錫，令元斌好妒忌。其後，兩兄弟不約而同鍾意咗學校校花，於是元斌用奸計將哥哥畫嘅校花素描當係自己嘅作品，騙得校花芳心。
自認係怕醜仔嘅元斌，喺呢套戲度獻出銀幕初吻，不過拍攝時就NG咗幾十次。另外，元斌為演好角色，特別鏟短頭髮，又經常着住底衫上陣，唔少嘅韓國年輕人重爭相仿效㖭！