煲碟王︰數碼收復最強聲畫《倩女幽魂》套裝悼哥哥

今個星期DVD碟場相當熱鬧，淨係3區碟都有5、6套中西大片落場，不過當中話題者，首推《倩女幽魂》BoxSet；經數碼修復，重新以dts-ES嘅6.1聲效作輸出，聲畫之靚絕，絕對是以往電視、DVD或戲院版從未達至的境界；場內人表示今個星期去貨已經相當厲害，一啲都唔輸蝕給新片，加上4月1日哥哥忌辰，珍藏及搶手程度可能會加倍推高！

記者：朱崇德
攝影：陳陶鈞

修復達B++級

今次三集《倩》嘅修復難度頗高，除咗菲林太過陳舊外，影片大部份都係陰暗場景，故調色校光暗等亦花費不少時間，幸好老拍檔GlobalVision技術高超，只需個半月就做好一集《倩》，而且效果十分之好，套用行內術語，修復版《倩》可達B++級數。（編按：《最強‧李小龍電影全集》為A級）

■潘大年先生

旺角價：約$200
■BoxSet有三套電影加一本書仔，配埋硬盒包裝，十分精美。

對《倩女幽魂》嘅印象已經相當模糊，細心一數原來已是18年前（1987年）嘅電影！雖然電視台間中翻播，多年來亦推出過幾個DVD版本，不過原片年代久遠，好多人都會發覺聲畫表現已經相當爛吓！今次重新以數碼修復嘅《倩女幽魂》套裝，包含晒《倩女幽魂》、《倩女幽魂II：人間道》及《倩女幽魂III：道道道》三集，硬盒包裝算幾精美，不過最令人心動者是隨碟附送的一本《倩女幽魂全傳》拉頁式小冊子，內裏收藏了三集電影及人物簡介，而最正是尾段的「拾遺」，記錄了拍片期間一些鮮為人知的趣事及相片，值得一睇！

■儍小子哥哥加索到爆嘅祖賢，當年睇到人如癡如醉。

■數碼修復效果出色，極暗嘅畫面都Tune得好好。

■利智出場，發揮其誰「乳」爭峯嘅本色。

舊版本
■顏色偏紅而冇層次，暗位細緻度完全欠奉，水盆後嘅背景唔清唔楚。

電腦修復版
■配色是跟足原著版的「偏淡」色調，而且背景亦睇得好清楚。

調色跟足當年燈光表

行內人都話今次《倩》套裝係現存的最靚版，電腦修復工作是交由老牌FortuneStar所負責，據公司總經理潘大年先生表示，基本電腦修復工作同之前推出極受好評的《最強‧李小龍電影全集》及《許氏經典系列》，都係由加拿大GlobalVision操刀。論經驗，連迪士尼多部經典電影都係交由佢哋做，質素絕對冇懷疑。
先講畫質修復，以往舊版原片比較偏紅偏暗，加上菲林上的陳年塵垢，令影片相當之花斑斑！新版經電腦修復後，已經完全根治偏暗同花斑問題；此外，製作之認真處，是整套電影在色調修復上，依足當年導演的「燈光表」作配色，並非胡亂調校，絕對原汁原味！試睇後第一個感覺是又清晰又有層次感，據知Remaster的原片，是以HD格式製作（即HDTVReady），由於現時DVD規格所限，只能做到480P，但畫面的清晰度已經是以往任何版本無可比擬了，相信將來HDTV電視普及後，更靚嘅高解像版會再次登場！

■舊片中加入今日的電腦特效，真係另有一番味道。

首次加入dts-ES

dts-ES6.1聲道效果，亦係今次另一大賣點！以往的《倩》都出過多個DVD版本，但離唔開者，都係2.0或5.1聲道，今次高試dts-ES6.1聲道，不但是此片的首次，亦是同系列《香港猛片．數碼系列》的首次！試聽感覺是包圍感做得唔錯，尤其是第一集王祖賢每次出場，配樂聲效同種種鬼魅聲效相互配合，真係做到忽遠忽近、激蕩人心嘅感覺！
縱觀三集新版《倩》，修復評分起碼是90分以上；雖然第一集《倩女幽魂》原片應該是最舊、原片損毀度最高的一齣，所以相對畫質會同二、三集有所不及；但驚喜感反而令人更強烈。據知灣仔一帶更有人將這套BoxSet拆散嚟賣，平均每齣售價為$70-$90，其實相當無理！不過就筆者所見，最多人搶嘅都係第一集《倩女幽魂》，對住一套咁經典嘅好片，有乜辦法唔偏心吖！

■《道道道》中王祖賢演得「放」好多，反而唔及第一集咁令人楚楚憐惜。

■第三集改用梁朝偉，當年反應麻麻，但比上集更有《倩》之神髓。

■《道道道》嘅特技明顯進步良多，較為着重妖魔間嘅打鬥。

■《道道道》色彩及聲效表現最好，始終套片都係較新，菲林損壞程度冇咁嚴重！

■第二集有李嘉欣，感覺好清純。

霑叔酒後作歌

Bonus內容唔多，不過都係首度曝光！分別有霑叔同元彬嘅專訪，元彬主要解構第三集的武術指導同特技難度，感覺一般；霑叔嘅專訪就放在第一、二兩集的Bonus內（內容一樣）！唔講都唔知，原來《倩女幽魂》一曲是在幾番苦求下，先成為電影主題曲，而《道道道》則是霑叔酒後之作，並臨時拉伕要唱埋。

■元彬大講武打同特技難度高，以當年計的確幾震撼。