「領匯」幾時可以上市重係未知數，但係「領匯」董事會主席王冬勝因為要做滙豐銀行執行董事，主政香港及中國地區業務，惟有提早同「領匯」講拜拜，剩番呢壇嘢只好另聘高明執手尾。
噚日「領匯」公布搵咗鄭明訓做非執行董事同董事會主席個位，睇往績鄭明訓班數似乎重高過王冬勝少少，做過立法局議員、香港總商會同香港美國商會主席，有晒政商界人脈，唔似王冬勝商界就叻，政界就冇乜經驗。
不過講番轉頭，今時今日政局凶險過以前好多，連保皇派都可以玩翻政府轉頭，家陣「領匯」冇收入，人就請咗一大堆，個個月燒成一千幾百萬開支，噚日就有消息話，領匯考慮將中環個辦事處部份地方退租慳番一筆。
若果正如一啲悲觀嘅房委會成員同八方講，「領匯」隨時出年都上唔到市嘅話，咁鄭主席點收拾殘局，真係好考工夫。
傳真︰2623-9278
電郵︰[email protected]