順豪科技（219）對上5個交易日，除咗長假前（周四）交易日係陽燭，其餘四棍，全部陰燭，再有沽家要錢唔要貨，正好收集。
順豪掛名科技，實質係地產股，科網熱時投資嘅3D入門網站，亦喺當時全數減值，所以，科網爆煲之後，資產質素冇變，並且受惠火熱樓市，變得重秤。順豪透過附屬華大（201）（69%權益）揸住英皇道25萬地皮、山頂物業，及順豪本身持有淺水灣物業，每股資產值已經有1.74元，現價折讓講緊係62%，已經夠秤。
再講，順豪04年度中期（6月止）因為出售賓吉道物業，獲利1.9億元，就當下半年打和，全年度純利維持1.8億元，PE講緊1.5倍，實在吸引。根據過往紀錄，順豪通常喺4月中公布年度業績，加埋呢隻股特性係衝刺一輪，然後淡靜。趁呢勻淡靜期，又before業績公布前，最好密密收集。折讓區區收窄到50%，股價回報講緊係30%過外。
盈大地產（432）星期三公布04年度（12月止）業績。因為貝沙灣龐大純利入帳，盈大PE睇落到7、8倍，冇問題。再講兩點，第一，盈大上年5月先正式獲注入貝沙灣項目，所以，04年度應該係較完整反映到貝沙灣純利年度，可以憧憬，要向上泵水，盈大有機會派息。第二，小小超曾幾何時話過，有意發展亞太區地產業務，呢勻阿媽電盈（008）又拍住祖國大孖沙網通，後者祖國手頭有高達1.7億平方呎建築區面積，盈大貴為小小超地產旗艦，自然會有聯想。又係before業績前，股價再跌，2.25元好兜底。
錢雋