百年名校皇仁書院近日接連爆出醜聞，繼有學生用激光筆射名畫之後，最近又爆出有兩個中二生周圍搞破壞去到學校附近嘅7-11便利店，將豉油、芥末等醬料包放入微波爐加熱嚟個「殘酷一叮」，結果醬料包爆到成個微波爐污糟晒，重壞埋冇得用㖭。
有自稱係皇仁學生嘅報料人發電郵話畀八方知，嗰兩個破壞王事後逃之夭夭，直至便利店店員翻睇閉路電視錄影帶，去埋皇仁認人，先至成功緝兇。破壞王嘅家長同校方向便利店又道歉又賠償先至大事化無。皇仁書院梁副校長話，其實呢件事喺年幾前發生，學校都已經對兩名學生作出處分。而校方最近都覺得學生嘅操行愈來愈差，所以請咗啲學生會前會長同前總領袖生向學生訓話，希望佢哋生生性性咁話。
傳真︰2623-9278
電郵︰[email protected]