舉行過無數大型體育同娛樂盛事嘅英國溫布萊球場𠵱家重建緊，暫定下年年初再開幕。呢個被譽為全英國最靚嘅球場，吸引巨星RobbieWilliams、U2、滾石樂隊（TheRollingStones）同洛史釗活（RodStewart）爭飲頭啖湯，希望成為第一個喺嗰度開演唱會嘅藝人。
位於倫敦以北嘅溫布萊球場進行緊約四億五千萬港元嘅重建，下年初就會開幕，到時會場可以容納九萬觀眾，大會亦已宣布下屆英國足總盃會喺嗰度舉行總決賽。正因個場非常矚目，唔少藝人都虎視眈眈。
溫布萊球場發言人日前就證實咗Robbie、U2、滾石樂隊同洛史釗活都向佢哋申請緊，務求成為溫布萊重建後第一位開concert嘅巨星，但有關方面未決定到將個期畀邊個。咁又難怪嘅，Robbie咁受年輕人歡迎、滾石係殿堂級、U2喺國際知名度高，而洛史釗活則受中坑愛戴，唔怪得有關方面諗到𢱑頭。
另外，U2嘅Bono前日同太太及設計師RoganGregory喺洛杉磯宣傳自家嘅服裝系列Edun，當日美妮哉花（MinnieDriver）同珍茜摩爾（JaneSeymour）都有嚟捧場㖭！