自從深圳地鐵通車以後，要玩轉深圳實在方便得多，出入唔使靠「打的」，再加上沿線大型商場、玩樂場所紛紛開業，比起只蒲「翻版天堂」東門更有睇頭。港燦們，趁復活節假尚剩兩天，請拿起你的回鄉證，來趟深圳一天自由行切身體驗。
記者：尹天仇 攝影：林伯 模特兒：Low、Blanche（d8）
國貿站
潮買國內李寧牌
由羅湖深圳地鐵站出發，話咁快已達國貿站的金光華廣場，連地庫樓高九層，商場裝潢高檔似朗豪坊，商舖亦走高檔路線，集齊HUGOBOSS、BALLY、MAXMARA等國際名牌，不過售價同香港相若，別指望可以執平貨，反而大隻Low夠精明：「喺深圳買入口貨梗係貴，睇吓有無平霸國產牌子重好啦！」率先衝上6樓的運動服裝層，發現土炮李寧牌，大隻Low話：「奧運選手都着，已經係SellingPoint啦！」李寧出品沒有預期中的土氣，鞋款同服裝都有七分似耐克（Nike），且便宜一大截，大隻Low最後更揀了件圖案tee返香港，話要帶動新潮流喎！
行到腳仔軟，往地庫2樓美食廣場，原來收穫重豐富，全層食店繁多，既有迴轉壽司、茶餐廳、東南亞美食、粥粉麵等，還有香港「紅極一時」的日本BreadPaPas泡芙，最後選定裝修超豪，但價錢比香港平一倍有多的鼎泰豐，大嘗僅?16一籠的小籠包。
金光華廣場
地址：深圳市人民南路
前往方法：國貿站A出口
大劇院站
女性主題百貨
飲飽食醉，再往下兩站的大劇院站，來到上蓋的萬象城，忍不住要再三驚歎：「乜家陣深圳開親啲商場都咁豪嘅？」無論格局、氣質以至縱橫交錯的扶手電梯，萬象城都似又一城的翻版，內裏既有達到奧運標準的溜冰場，又有全深圳第一間嘉禾影城戲院，再加超過300間名店，一日都行唔完，Blanche就最鍾意來自台灣、以女性做主題百貨公司的REEL，因為由美甲、衫褲鞋襪以至精品都統統有齊，美少女到此一定心花怒放。在REEL毗連還有似足City'Super的Ole，賣的以入口貨居多，但格調超高檔，貨品唔會擺到亂七八糟，重備有國產超市少有的紅酒Counter同芝士Counter。
萬象城
地址：羅湖區寶安南路1881號
前往方法：大劇院站C出口
科學館站
竹墊任坐打書釘
想文化一點，往科學館站一出，即見樓高六層的「深圳購書中心」，書籍數量及品種比舊書城多出3倍，頂層更有影音及文具發售。這兒新淨又光鮮，不似舊書城燈光陰暗、地方陳舊，但最感動都係有竹墊畀客人坐在地上打書釘，底層設有小食部畀你回氣再衝剌，另每層設有電腦可查閱藏書資料，又有每月銷售排行榜及不定期展覽，即使掃書掃到用盡全身人民幣，$1港幣可兌換?1.05人民幣，唔似其他店舖只肯收1:1，總之就係文化天堂！
深圳購書中心
地址：深圳市福田區深南中路上步路口
前往方法：科學館站A出口
華強北站
平霸碌齡每局?5
除「老翻天堂」東門，華強北路亦是另一個港燦最熟路的地方，見盡新型大Mall後，對「女人世界」、「銅鑼灣百貨」這類舊商場已失去興趣，更不要說那些比香港更貴更舊的電子產品，不過，華強北勝在有一個保齡球場，就連深圳市體育局都指定作訓練及比賽場地，內設24條美國AMF球道，裝修唔算新但起碼乾淨企理，最大賣點係夠平，上午9時至下午3時的非黃金時間，每局都係?5，即使到夜晚8時至11時的黃金時段，一局也不過?15。
球王保齡中心
地址：福田區紅荔西路（華強北女人世界後）
電話：（86）755-83254036
深圳地鐵二三事
深圳地鐵勝在夠快夠平，第一期由去年12月尾通車，近至東門遠至世界之窗，車費?2至?5，比搭的士更化算，唔識路可向服務姐姐查詢，車廂同月台都相當整潔，絕對沒有剛通車時的混亂情況出現，缺點係等車時間太長，閒閒哋要等10分鐘以上，認真要改善吓。
