大狀梁家傑喺《基本法》23條一役，平地一聲雷成為政壇新星，民主派近日搵人補選特首，梁大狀肯定係人選之一，不過佢就非常之謙虛，噚日喺電台節目裏面話，雖然自己支持民主派人參選，但覺得自己並非最合適人選，「要選特首，諗吓自己有冇料到先啦。」佢又公開呼籲，有料到之人應該當仁不讓自動請纓。至於邊個係有料到之人，梁大狀冇講明，只係講笑話董太可能都係唔錯嘅選擇。
梁大狀平日官仔骨骨，衣着非常講究，噚日有人問佢點睇謝偉俊俾律師會「釘牌」單案，佢好坦白咁講，身為法律界中人，佢就接受唔到一個律師着住條泳褲喺中環影相，律師會罰謝偉俊停牌，梁大狀就覺得呢個唔係太苛刻嘅懲罰。
傳真︰2623-9278
電郵︰[email protected]