賓架聚會，吃飯前先聽公子Ｔ演講，公子Ｔ今年大手筆取消遺產稅，賓架梗係高興到極，一來益到自己仔女，二來益到銀行生意—吸引外地存款及離岸存款回流，真係錫晒公子Ｔ。可惜公子Ｔ講到明七月十日唔去馬，否則選委會中之賓架代表分分鐘會落注呢匹馬。
公子Ｔ演講之時，賓架Ｐ不時低頭睇e-mail，將架blackberry（黑莓）猛咁㩒。左丁山問：「使唔使咁緊張呀，飯都食唔落噃？」賓架Ｐ苦笑：「袋住架黑莓，實會上癮，唔睇唔得，啲人知道你有黑莓在身之後，每送e-mail過嚟，就預期你立即回覆，否則就係拖延，唔重視佢，於是為免得罪人，尤其是大客戶或者上司，我要立即睇，盡快回覆，對自己增加咗好多壓力。譬如大老闆一個電郵送畀幾十位高層行政人員，徵詢某項意見，我哋就好似小學生問答比賽咁，鬥快搶答，以示反應敏捷，我試過兩次上床瞓覺前收到大老闆電郵，擒擒青回覆，老婆哦到我暈！」
科技進步，效率提高晒，同時大大增加咗我哋嘅壓力、焦慮。公子Ｌ袋住一個PDA、一個新款M記超薄手機，好有款，問佢點解唔用黑莓，公子Ｌ嘅答案與賓架Ｐ相似：「用黑莓會上癮，一於唔用，免增壓力。」左丁山係低科技人，PDA都冇，隨身只有一部古老手機（三年新）。好似科技Ｙ咁，一家三口去放復活節假，執行李時，除咗衣物之外，自己帶手機、黑莓、數碼相機、數碼攝錄機；老婆帶手機、小型輕巧電腦（在酒店上網睇《蘋果日報》兼電影喎），再加幾套DVD電影；個仔帶GameBoy，重有JohnGrisham小說、讀者文摘、日本漫畫，搞到行李喼都重多十磅八磅。去放假，輕鬆減壓吖，還是繼續疲勞？愈多科技，愈多自製緊張！