賭王何鴻燊嘅四姨太梁安琪下個月就宣誓就任保良局總理，點知保良局前總理林依麗日前指摘佢有違保良局「保赤安良」嘅宗旨，力阻四姨太入局。四姨太前晚同賭王、房屋及規劃地政局局長孫明揚夫婦，一齊喺福臨門酒家食晚飯，本來四姨太心情唔錯，但當佢聽到林依麗個名時，即刻忍唔住變臉。
前晚十一點，四姨太同賭王離開酒家，記者問佢對林依麗反對佢入保良局有乜睇法？四姨太粒聲唔出極速上車，尾隨嘅賭王就好似乜都聽唔到，重好闊綽咁各派一百蚊貼士畀三位泊車人員。記者再追問四姨太，但佢竟即時變臉，催促保鑣話：「快啲叫佢（何鴻燊）上車，唔好理佢哋。」
賭王同四姨太離開一分鐘後，四姨太嘅好友孫明揚夫婦跟住離開酒家。對於林依麗話有人推薦四姨太入局一事，孫太鍾少芬就為四姨太抱不平話：「梗係唔係啦，費事理嗰啲人，對佢冇回應呀。」提到林依麗話有人靠打牌鬆章，以博取喺社會活動度上位，孫太話：「梗係唔係啦，啲人誇張咗啫。」孫太句句說話都幫住四姨太，睇嚟佢哋真係好friend喎。
徐若瑄日前錄影由路嘉怡主持嘅ChannelV節目時，穿上露背裝上陣。徐若瑄話今年夏天會好興着露背裝，重傳授幾招美背方式畀姊妹，佢話千祈唔好寒背，另外練瑜伽同跳拉丁舞都好有幫助。問徐若瑄嘅性感限度，佢話：「只要好看都OK，但淫蕩的裸露就不行了。」
唐澤壽明噚日喺台灣舉行握手會，佢除咗同影迷握手外，重任攬任錫唔嬲，又講笑𠱁人，重用埋普通話向fans講多謝，令啲fans非常興奮。問唐澤壽明鍾意食啲乜嘢？佢好搞笑咁話：「小籠包，因為我係小籠包先生。」
馮仁昭覺得其他日本藝人都應該學吓唐澤壽明呢種親切嘅作風。
薛家燕（好姨）前晚帶埋大女石佑珊去文化中心睇《美麗女狼》首映，同行重有珊珊嘅男同學，好姨一見記者，就好緊張話個男仔唔係珊珊嘅男朋友。問好姨會唔會擔心個女拍拖？佢話：「𠵱家冇所謂啦，喺外國識多個男仔，搬屋都易啲呀。」咁啱黎小田行過，佢話好姨就嚟結婚，搞到好姨鬼死緊張咁否認。
噚日有內地網報道話鄭秀文（Sammi）嘅頸部淋巴出現毛病，重話Sammi曾經入院做手術，令拍攝中嘅電影《長恨歌》一度停拍。Sammi嘅經理人郭啟華噚日即刻否認，佢話成件事係無中生有，Sammi相當健康，重喺上海拍緊《長》片㖭，郭啟華又話網上太多流言，所以唔會花時間追究。
