城中首富李嘉誠唔執輸公開挺曾，以為係好事，但係反而累事，因為有啲人唔鍾意李超人，結果連煲呔都失分。加上自由黨最近做咗個民意調查，話佢哋主席田北俊嘅民望，雖然同煲呔有距離，但並唔係咁大幅度，搞到煲呔嘅軍情好似有啲告急。
八方日前為八位熱門人選，做咗個好簡單嘅民意調查，利用電腦電話系統，訪問咗二百七十幾個十八歲以上嘅香港人，問佢哋邊個做特首好？八方讀咗八個名畀佢哋揀，次序抽籤決定，包括卿姐、煲呔、唐唐、馬丁、田少、湯大狀、達仔以及振英哥。
得到嘅答案係煲呔遙遙領先，民主派聯手都對佢冇嚟威脅。煲呔今次真係富貴迫人來，民望高，又識得做戲，睇怕坐定粒六入住禮賓府。
個結果都好有趣，煲呔有成二百人（即約七成一人支持），跑贏成條街；第二位係馬丁，有百分之七點二嘅支持；唐唐都唔弱，排第三，有六點八支持，跟住係湯大狀支持率有六點一二、卿姐同振英哥真係寃家，同得百分之三點二四支持，排第五。
至於自由黨嘅主席田少，雖然未至於包尾，有百分之二點二嘅支持，但佢同煲呔嘅距離，又唔係自由黨諗咁近噃。而民主黨揸弗人達仔話，可能因為太多民主友好同在一榜，所以攞唔到分，呢個當然唔係真實情況，達仔唔好太傷心，亦不要輕言放棄。
傳真︰2623-9278
電郵︰[email protected]