雷林靜怡、胡敏珊及馬詩慧等前晚往金鐘太古廣場，出席一手袋慈善活動，各人均畫了一幅小孩子心中的彩色世界。雷林靜怡構思的畫作是她們一家四口的未來版，她表示因為兒子十分嫉妒妹妹，所以在兒子面前盡量少抱女兒，自責對女兒的愛不足夠。
雷林靜怡、馬詩慧、胡敏珊及陳妙瑛等前晚往金鐘太古廣場，出席手袋品牌Furla的慈善活動，各人應邀繪畫一幅小孩子心目中的彩色世界，這些畫作將製成賀卡籌款，善款捐往聯合國兒童基金會。
雷林靜怡的作品是一家四口樂融融地站在屋前，原來這是其家庭的未來模樣，她說：「係呀，呢個係我哋屋企嘅未來版，idea由我諗，再由老公幫我用電腦完成，佢都畫咗成晚㗎。」雷林靜怡早前透露兒子Jeremy十分嫉妒只有三個月大的妹妹，問她現在情形有沒有改善？她說：「改善咗啲啦，呢方面我都好自責，因為我怕個仔呷醋，所以喺佢面前都盡量少抱、少錫同少啲同個女影相，下個禮拜我哋重會撇低個女，淨係帶個仔去日本旅行，我惟有同自己講，個女𠵱家得三個月大，重未識呷醋住啦！」
至於陳妙瑛的畫作則是小孩玩摩天輪，她說：「因為我知道好多第三世界嘅小朋友，莫講話未玩過摩天輪，連係乜嘢嚟都唔知，我自己就好好彩，媽咪陀住我嘅時候，我已經玩過摩天輪，但係大個咗反而好細膽，摩天輪甚至機動遊戲都唔敢玩。」
採訪、攝影：DebbieLum
