二五之爭，難分難解，相信最後要人大釋法，先至可以真正一錘定音。阿爺素來都係話事嘅，但話事要真正下聖旨至夠權威，一味由一啲甚麼內地法律專家說三道四，當香港啲法律專家冇到，點可以服眾呀。即使許崇德、王振民幾權威，佢哋都係冇法定地位之人，講咗唔會有法律效力。資深大律師喺香港夠權威啦，佢哋嘅意見點可以當係法庭判詞呀？
賓架Ｃ自上海來，開壇講學，佢講到二五之爭，話有好多變數，當奴佘未必可以二加五，遑論二加五加五，做咗十二年咁開心。政治界有一句說話，一星期會係好耐時間，何況兩年？賓架Ｃ喺上海睇咗一套電視片，係解放軍戰事片，其中一段情節話上司突然退任，副手冇得升正，上頭反而擢升阿三做署理。副手（阿二）條氣唔順，但唔敢出聲。過咗幾個月，上頭叫阿三返回原位，由副手做署理，副手大喜，心諗梗係阿三未夠資歷，上頭不滿，卒之都係由自己上位。副手嘅秘書進言：「千萬不可喜形於色，當今官場，上而不上，下而不下，因住因住。」副手做咗幾個月，被逼番落嚟，阿三越級升正，副手為之喪氣。
賓架Ｃ話：「同樣可以奉勸當奴佘，上而不上，下而不下，朝廷瞬息萬變，兩年時間非常長，上可以下，下可以上，照我睇，大局未必已定，當奴佘要醒醒定定。」董生辭職，適值經濟好轉之時，賓架Ｃ話：「辭職時間好啱曾國藩理論，就係大難之時萬不可辭，形勢轉可，方可呈辭。北京高層對古代詩詞咁熟，一定讀過曾國藩。你哋班番書仔，讀西方政治理論就唔識解讀朝廷嘅㗎，快啲讀吓曾國藩、《資治通鑑》！」