啱啱喺今個月二十號舉行嘅南區區議會鴨脷洲北選區補選出現戲劇性結果，五個候選人中，張錫容同趙炯成同時得到七百零二票，結果要抽籤決勝負，由張錫容勝出。雖然選舉塵埃落定，不過近日網上流傳一段選舉期間各候選人嘅助選團落力拉票嘅片段，其中張議員兩名助選員表現最激動。
從片段所見，嗰兩名分別穿着紅色同黑色外套嘅仁兄，手持二號候選人張錫容嘅直幡，見到有人拎住攝錄機拍攝，即時好唔客氣咁質問揸機人「影夠未」，其間重不時舉起支直幡有所動作，眼見鏡頭繼續對住佢哋，兩人更加爆出一連串粗口。八方睇見佢哋個樣兇神惡煞，都幾嚇得吓人。
八方問張議員當日發生乜事，張議員聲言乜都唔知，又話唔知助選團中有乜嘢人，叫八方搵佢經理人陳文俊查詢。陳文俊亦話唔知詳情，但承認助選團成員來自「四方八面」、「乜背景都有」，相信只係部份助選人員太投入拉票，先會出現爆粗場面，重話：「選舉已經完咗，呢啲只不過係小環節啫。」
傳真︰2623-9278
電郵︰[email protected]