秀茂坪公屋寶達邨達貴樓住戶投訴，其中一部電梯的閉路電視故障超過一年仍未修妥，另外三部電梯內的閉路電視亦相繼故障，出現雪花及欠清晰，保安形同虛設。管理公司辯稱因找問題根源、申請批准和訂零件，所以需要時間跟進。
「我入伙到𠵱家都已經一年有多，但係電梯嘅閉路電視到𠵱家都未整好，真係對住客嘅人身安全冇乜保障！」
達貴樓低層住戶呂小姐稱，她於前年十一月遷入，達貴樓共有四部電梯，她多使用一號及二號電梯上落，一號電梯內雖有設有閉路電視，但形同虛設，因閉路電視故障已逾年未修。
她說，「我曾經喺屋企開電視，轉台睇吓個閉路電視影緊乜，點知見到一號梯個畫面漆黑一片，再走去問管理員先知原來壞咗。」自此，她間中透過電視，檢查閉路電視修妥沒有，結果令她失望。
她稱，初時僅一號電梯閉路電視故障，但近日二號電梯內的閉路電視同樣報銷；她從電視觀看其餘三部電梯內情況，畫面則布滿雪花或欠清晰，未能發揮監察作用。
她雖曾追問職員閉路電視維修進度，但職員有時稱「訂緊零件」，有時又稱「壞咗整緊」，總未能確切回答何時才修妥。
管理寶達邨的富城物業管理有限公司，管業經理葉先生表示，因為達貴樓一號電梯內閉路電視線路板出現故障，故斷斷續續出現故障逾年。「我哋工程部花咗唔少時間先搵出問題嘅源頭（線路板出現故障），又要上報房屋署申請批准買零件，又要花時間喺出面訂零件，所以先搞咗咁耐」。
他否認一號電梯內閉路電視年來持續出現故障，「我哋試過搵其他零件代替住先，所以都曾整好過，不過轉頭又壞咗」。葉經理強調，管理公司已積極跟進，希望可於復活節後修妥故障的閉路電視，其間並會派員加強巡邏。（○三一二○四二）
觀塘區區議員蘇家豪稱，達貴樓閉路電視故障的情況斷斷續續已超過一年。他直指管理公司態度模稜兩可，且拖拖拉拉，「拖咗成年有多都換唔到鏡頭，問嚫都答唔到幾時換」。過去他曾多次透過邨管會反映，及去信警方東九龍防止罪案科，要求跟進及提供協助。
本月初，他獲得警方回覆稱，經調查發覺有閉路電視系統發生故障，警方已去信房屋署及管理公司，要求他們作出相應行動。「閉路電視鏡頭壞咗，就乜都睇唔到，完全發揮唔到監察作用，咁樣好易有罪案發生㗎。」
服務熱線
電話：29908288
傳真：23702192
電郵：[email protected]