八方噚日講過，立法會議員郭家麒趁復活節假期，同朋友參加帆船比賽，出海去菲律賓，其實重有唔少議員都會喺假期出外，有啲行開吓叉電，有啲就一於工作至上，假期都照樣咁頻撲。
法律界吳靄儀已經飛咗去美國，佢今次係應哈佛大學同耶魯大學學生嘅邀請，去當地講吓香港法治情況。回歸七年幾以嚟，香港法治問題多多，近期補選特首任期爭議得火紅火綠，相信吳靄儀實大把話題。
地產界石禮謙亦會出門，但就唔願透露目的地，八方聽聞佢會去澳洲玩幾日；「大班」鄭經翰亦話會陪老婆同三個仔遊埠，不過佢話唔方便講地點，費事俾人跟喎。
傳真︰2623-9278
電郵︰[email protected]