董建華以病請辭，所謂人走茶涼，唔夠一個月，香港人好似已經唔記得有呢位老伯存在。老董亦好識做，同老婆去咗上海，實行避靜，遲吓先再蒲頭。
老董有冇病，大家都心知肚明，呢個肯定係政治病，完全冇得醫，鬼叫大靠山老江退到冇晒位企，胡溫曾重使乜留手？
不過，識老董嘅人都話呢件未必係壞事。當然一下子唔使朝七晚十一，有人怕佢唔慣會病。話說老董過年嗰陣患咗感冒，醫生叫佢減少應酬，年初七（二月十五日）當日只准出席喺禮賓府舉行嘅酒會，當時勞聯嘅李啟明就問候老董，老董答佢話：「已經好番晒啦。」跟住冇幾耐，老董又行番轉頭，話自己身體本來好好，但係一放假休息吓就病，言下之意佢唔放得假，否則會病……
一個月唔夠董生忽然話自己身體大不如前，腳又痛腦筋又不靈，你話發生咗乜嘢事？
老董有冇病查實好易知，政府高官同八方講，自從「沙士」事件後，老董好注重健康問題，自己一有病就戴口罩（可能係董太成日提佢洗手、戴口罩所致），佢喺禮賓府嗰日都冇戴，只係唔知點解忽然唔見咗人啫。
傳真︰2623-9278
電郵︰[email protected]