大美人關之琳昨日身穿低胸裙宣傳其代言的護膚品，她表示女人要靚，除了要靠護膚品外，愛情滋潤亦很重要，不過關之琳表示目前感情生活一片空白，更大歎難覓理想對象，故她只能靠敷面膜來滋養容顏。
關之琳昨日在銅鑼灣以代言人身份宣傳護膚品「MarjorieBertagne」時，以一襲低胸連身裙到場，謀殺記者不少菲林。關之琳表示會為該品牌擔任兩年代言人，問她對酬勞是否滿意，她說：「七位數字就梗係有啦，之前我推咗成十幾個同類型品牌，損失都有成千萬㗎。」
關之琳入行以來一直被視為「大美人」，但她表示自己在肌膚護理上亦下了不少工夫，她說：「我細細個就好貪靚，十幾歲就開始敷面同敷青瓜，不過我覺得情緒好緊要，咁當然有愛情滋潤就最好啦！」問關之琳目前是否主要靠愛情滋潤身心時，她說：「有愛情滋潤係好，不過我𠵱家多數要喺屋企敷面膜。」
最近跟霍建華傳緋聞的關之琳，表示雖然目前未有拍拖對象，但身邊不乏追求者，她說：「係有人追，不過我覺得自己愈嚟愈難搵對象，人大咗要求亦高咗，要有好多嘢配合，我本身要求嘅嘢好簡單，但往往對方要求都唔同，不過目前有好多朋友陪我，愛情對我係好緊要，但冇都冇辦法，咪輕鬆吓享受一個人嘅生活囉。」
關之琳又透露今年接拍內地導演馮小剛的新戲，問男主角是否劉德華時，她說：「唔知呀，好多嘢都唔講得住，總之就係大卡士。」
採訪：王崇穎
攝影：仇志德
