大市企得穩，真係要歸功散戶，大行近期積極沽滙控（005），但散戶在125元大舉入市接貨，噚日雖一度被質至123.50元，但散戶又買回124元收市，最後冇起跌，成交達16.5億元。
建滔（148）下周三公布全年業績。噚日一波出報告，估佢04年盈利大升1.2倍至10.39億元，目標價大幅調高接近50%至29.55元。消息刺激建滔大升6.26%至24.60元。黑客話，大行在業績公布前突然調高股份目標價，可能是有好消息跟尾，所以一定要留意。
建滔管理層揚言想做藍籌股，此股噚日市值已達177億元，若然升至29.55元，市值會高達212億元，超越聯想（992）及駿威（203），自然有資格問鼎藍籌席位。一般估計，建滔會繼續進行收購合併，以壯大公司。
光大控股（165）開市後20分鐘內急瀉12.6%至2.95元，聯交所網頁在10時38分才刊出光控正式發出的盈警通告。嘩，重有冇再遲啲呢？另外，聯想獲基金入股的消息，早於前一晚便傳到通晒天，但聯想噚日在開市後6分鐘才停牌，阿虎初時重以為聯想唔使停牌，短短6分鐘，聯想股價已升4%至2.55元，成交1748萬元。
聯通（762）噚日尾段突被掃高，倒升0.8%至6.25元。阿虎重以為有春江鴨預知業績較預期好入市掃貨，點知業績出嚟重差過市場預期下限（市場本來已唔睇好），全年賺43.9億元人民幣，增長4%。唔知下周二港股開市會唔會被質番轉頭呢？
黑客話，現時炒聯通的資金並非炒業績，而是炒其拆骨重組，聯通表明增加GSM投資，意味出售CDMA的機會大增。
阿虎