「完全做唔到角色，又浮誇又外露」
秋生寸元華、元秋演技差

黃秋生前晚出席新片《精武家庭》首映禮，他大讚獲金像獎多項提名的《功夫》及導演周星馳出色，卻批評元華及元秋演技浮誇，更直指元華是戲中表現最差的一個，不過元華及元秋對此則表現淡然。

黃秋生前晚到時代廣場出席新戲《精武家庭》首映禮，曾奪影帝的秋生將於後日出任金像獎頒獎嘉賓，被問到看好誰會奪得今屆影帝影后，秋生說：「我睇好周星馳，《功夫》我兩日睇咗三次，連對白我都記得，但男主角就未必得，電影、導演同劇本就好有機會，其他戲我冇睇到，好難講人哋，我從來冇投票，唔係專家。」

指角色處理甚失策
主演《功夫》的元秋獲提名最佳女主角，對此秋生說：「一定唔得，做得差呀，佢個角色casting好、角色好、故事好，佢又唔曳，但做得好浮誇，比戲入面其他人都浮誇。」秋生大讚另一《功夫》男星梁小龍做得非常好，不過一提到元華，他即說：「元華最差係佢，完全做唔到個角色，又浮誇又外露，唔識嘅人都睇得出啦，元秋嘅演技嗰種方法可能係角色需要，元華就冇經過處理，唔明周星馳點會喺呢個角色處理咁失策。」
秋生愈講愈投入，不過說話似乎有點矛盾，他之前讚完周星馳，其後卻說：「梁小龍嗰part語言技巧好係周星馳，元秋嗰啲唔係元秋諗嘅，一定係周星馳。」那麼秋生是否指元華及元秋是該部戲的敗筆？他說：「唔好雞蛋裏挑骨頭，部戲嘅音樂、技巧等所有嘢都好好，不過個角色跣一跣佢囉，都係咁啦。」問秋生怕不怕得罪人？他說：「我又唔係話佢哋唔好，只係做得唔夠好。」
提到被秋生批評演技，元華昨日在電話中說：「多謝批評，佢係影帝，梗有資格批評我，我真係做得未夠好嘛，我唔嬲，順吓佢意囉，佢鍾意講乜就講乜啦。」
而元秋則在電話中說：「冇所謂，各人睇法唔同，使乜同人爭論啫，套戲喺好多地方都有好評都收得，咁咪ＯＫ囉，我唔會唔開心，有批評先有進步，我浮誇嘅話，下一部咪唔浮誇囉。」那麼元秋是否認同秋生的批評？她說：「唔係認同，佢講我只可以聽，任何一樣嘢都要慢慢進步，我唔想講任何說話變成罵戰，黃秋生不嬲係鍾意講乜就講乜，我同佢唔熟亦唔識。」

「導演收貨咪得囉」
問元秋對秋生的演技有何看法，她說：「有啲好有啲唔好囉，我唔敢批評人，我做演員，導演收貨咪得囉，起碼有兩個提名，攞唔到都好開心，都係賺咗。」