早上十點過後，喺中環街市旁邊碰到投資S，好似起床不久咁嘅樣。投資S話：「喂，去PacificCoffee飲杯咖啡先。」左丁山要趕住開工，冇時間去飲咖啡，問佢生意如何？投資S話：「以前做落啲投資，𠵱家回報率極高，譬如幾年前投資上海一間廠，用咗八百萬美金，最近估值上市，投資銀行話我哋嗰份股權值一億美元喎，直情賺到笑。不過現在喺內地投資，競爭激烈到冇人信，大把海歸派自華爾街大行辭職，走番去上海搞VC（創業基金），搶走我哋好多投資機會，因此好多民企變成皇帝女，我就認為佢哋叫價太高，風險好大，制唔過！」
制唔過就做少啲，唔怪得可以九點起身，行幾步路，坐行人電梯落山，由半山區到中環街市，好快就到。投資S一位老友投資E就風塵僕僕，每星期穿梭北京、上海、香港之間，為老闆找尋直接投資機會，私人時間就買番一兩層樓炒吓，賺到唔少外快。投資E話上海樓價升得太急，兩年前佢用千零蚊美金每平方米買入嘅一個單位，佢以兩千幾美金賣出，點知現在升到接近四千，為之目瞪口呆，自覺睇唔通，退出市場，佢話：「十年前，如果北京樓價係兩蚊，上海就係一蚊；𠵱家掉轉晒，上海兩蚊，北京一蚊。夠膽者就可以去上海炒個飽，恢復『上海是冒險家的天堂』的美譽。」二十世紀三十年代，上海有冒險家樂園之稱，威過香港好多，現在不過還原舊制而已。
投資E在上海碰到一位香港炒家，炒樓毫不手軟，但對港式豪宅甚有微言，認為無論講圖則、材料、用具，港式豪宅都唔夠貴格豪氣，反而坡佬（新加坡人）起啲樓重靚。炒家對投資E講：「喺香港起慣居屋，嚟上海起豪宅，始終唔同層次！」