美國著名男士雜誌《FHM》喺前日公布咗由公眾投票選出嘅最新「全球最性感一百大女星」名單，同畢彼特（BradPitt）頻傳緋聞嘅安琪蓮娜祖莉（AngelinaJolie），由上年嘅第二位升上榜首，但經常打入同類型選舉十大嘅畢仔前妻珍妮花雅麗絲頓（JenniferAniston）竟然排第四十一，真係戥佢唔抵咯！
電視劇《特務Ａ》女星珍妮花嘉娜（JenniferGarner）今次首次登上第二位，而排第三嘅就係唔少麻甩仔都話索嘅富家女ParisHilton。其他打入十大嘅女星包括第四位嘅查理絲泰朗（CharlizeTheron）、第五位嘅荷爾芭莉（HalleBerry）等，而劉玉玲就成為唯一上榜嘅華裔女星，排第五十六。
至於上年第一位嘅Britney今年就被踢出百大，《FHM》嘅編輯解釋話：「佢已經嫁作人婦，令好多男人心碎。」
講開安琪蓮娜同畢仔，佢哋拍嚟拍去都拍唔完嗰套新片《史密夫決戰史密妻》，上星期四又喺洛杉磯補拍一場親熱嘅接吻戲，有狗仔隊當日影到佢哋兩個鏡頭前後都好有默契嘅相。據講電影公司見佢兩個嘅緋聞傳到㷫烚烚，所以特別加多啲親熱戲份。