復活節長假期前夕，大市氣氛照例淡靜，其實好多炒家都已經外出旅遊，而散戶就算見到有平嘢執，好多時都唔想買，主要唔想持貨過長假期。
例如經紀黃早前推介的天虹紡織（2678），將在下周四公布上市後首個全年業績，天虹話晒新簇簇，照計業績唔會難睇，而且貨源頗歸邊，有心人想將股價踢高應該唔係難，但小初睇足一日，都係猶豫不決。
經紀黃話，生產紗線同埋坏布的天虹，雖然Size細細，但賣點就係產品夠專一和獨特，加上經營模式夠特別，專門收購破產國企的廠房，然後加以改造。外間又喜歡將佢同另一間大型紡織股魏橋紡織（2698）相比，所以有得諗。
天虹去年年底上市時跌穿招股價，但獲得一家美資芬佬垂青後，街貨已收得七七八八，所以股價能夠一直在1.20元至1.30元之間徘徊。
天虹噚日升4.88％，收1.28元，成交股數300萬股，金額373.45萬元。
慕容小初