濠江賭權開放，唔少上市公司立即過江買間有賭場設施嘅酒店，變身博彩概念股，有「大廚坤」之稱嘅黃坤亦唔落伍，佢間東方明珠早排宣布買澳門金龍酒店，噚日開股東特別大會表決單交易，結果當然係通過收購啦。大廚坤見到班小股東咁支持，忍唔住同佢哋傾吓偈，重問佢哋對間公司有乜意見。
有小股東問：「間酒店好唔好生意㗎？你有冇賭牌㗎？」大廚坤當然冇被考起，佢重好有心機慢慢解釋澳門開放賭權後博彩業經營情況，不過個股東重係要問：「咁你有冇賭牌啫？」黃坤笑住咁答：「我哋冇，澳門得三個賭牌，我哋係同何生合作做賭場啫。」小股東又問：「咁你哋今年有冇股息派？」答案係：「未定」。唔好以為小股東會好失望，因為當黃坤應付完八方同埋行家後，又嗱嗱聲同正在飲茶食點心嘅小股東，繼續交流心得，絕對唔會冷落股東。
傳真︰2623-9278
電郵︰[email protected]