王菲同李亞鵬拍拖得嗰一年左右，近日就盛傳會喺下個月結婚，呢幾日佢哋重去咗法國，話係試婚紗喎。呢排佢哋啲朋友見親人，就會俾人問有冇收到「李王聯婚」嘅喜帖，究竟係咪真係會結婚，當事人點都唔肯講，搞到連英國網上博彩公司易勝博都開盤，畀人賭吓「王菲、李亞鵬將在四月舉行婚禮」係咪真！
今次賭盤嘅準則係，如果喺今年五月六日或之前，TVB嘅《娛樂大搜查》中播出「鵬菲婚禮」嘅正式片段或當事人親口承認，咁即係佢兩個喺下月結婚啦，賠率就係1.7倍，否則就當佢哋唔係下月結婚，賠率係1.9倍，下月一號截止投注。照賠率睇，易勝博認為王菲會喺下月結婚機會大啲，不過開咁嘅盤，似乎易勝博着數晒喎。
易勝博行政主管梅爾文南森話，王菲經理人陳家瑛都話要預備結婚禮物，兩位當事人又飛去巴黎試婚紗同影婚紗相，種種迹象顯示兩人會喺短期內結婚，當年碧咸夫婦結婚都冇開盤，今次「鵬菲戀」魅力非常之大，佢哋考慮以後再推出一系列相關賭盤㖭。
張學友噚日喺廣州綵排舞台劇《雪狼湖》，佢話細女已經兩個幾禮拜大，不過重未改名，要等師傅改。問到學友送啲乜嘢畀老婆羅美薇？佢就話重未諗到，不過陪老婆坐月，自己都肥咗，學友話：「咁佢食唔晒嘅嘢，我全部幫佢食晒嘛。」
周杰倫出席IFPI頒獎禮之後，前晚七點幾喺銅鑼灣D-Mop出現，佢着住件衞衣又戴埋太陽眼鏡，以為咁樣會低調啲，可惜佢身邊有幾個助手同經理人圍住，重有十幾個fans跟尾，係人都見到啦，結果間時裝店要關門畀佢一個人安安靜靜咁買嘢，最後佢買咗成六、七袋戰利品走，返酒店執拾行李後，就返內地工作。
林熙蕾噚日喺無綫電視廣播城幫修身堂拍攝瘦身廣告特輯，據聞佢將會取代同修身堂合作好耐嘅朱茵出任代言人，老闆娘張玉珊話係同林熙蕾傾緊細節，而且簽約成數好高。至於林熙蕾就話好開心獲邀請做代言人，而且唔介意以三點式泳裝示人㖭。
何鴻燊嘅四姨太梁安琪將會喺下月中擔任保良局總理，惹嚟曾經擔任總理嘅林依麗反對，前日佢開記者會話四姨太會影響保良局嘅形象，噚日又再發傳真畀各大傳媒同團體，包括民政事務局局長何志平同教育統籌局局長李國章等，唔知呢件事幾時至平息呢？
黃宗澤噚日喺新城接受訪問，提到喺內地拍劇嘅趣事，黃宗澤話：「我次次喺內地拍完劇返香港，體重都會肥幾磅，真係唔明點解，食咗內地嘅米好似會好快肚餓，而且啲菜又特別好味，我次次都食唔停。」而佢又提起佢老友楊明早排涉嫌醉酒駕駛，黃宗澤想打電話問候佢，但就聯絡唔到佢。
繼鞏俐同章子怡兩位內地天后成功進軍荷李活後，內地靚女影星范冰冰前日亦透露已接咗一部荷李活電影，而𠵱家就進行密集式英語訓練。喺新片入面范冰冰飾演一個虛擬世界入面嘅中國女子，到時重會同新一代《蝙蝠俠》男星基斯頓比爾（ChristianBale）有感情戲㖭。范冰冰話：「他雖然是動作明星，卻很斯文。」
