長假在前，個市戰況唔見激烈，恒指高低得65點，埋單微跌6點，和氣收場。要戰，都等過埋復活節。
中石油C輪：眾人最興高采烈之時，投機物體價格可能就係短期見頂之日，市場有兩個字叫做超買。上禮拜四，紐約期油高見58.10美元，前晚，唔覺唔覺跌落53.81美元，4日之間由高位散4.29美元，其中2.20美元跌幅係喺前晚錄得。
油股跟住油價移動，主角中石油（857）收4.75元，再跌3格，同周三最高價5.15元比較，縮水8%。中石油C輪自然跟住散，有成交跌得最勁嗰隻蒸發25%。中石油係芬佬鎮倉之寶，如果再跌，買盤更勁，有機會上番去。畀少少耐性，等中石油回落到4.50/4.60元，候低買C輪博反彈，主角係昨日跌得最勁嘅3610，年底到期，輪價28仙，溢價4.4%，槓桿率17倍（有效8.6倍），引伸波幅19.3%。想比較易買易賣，揀3888，呢隻壽命短啲，槓桿率大啲，要畀高啲溢價。
中石化C輪：中石化（386）股價對油價反應冇咁敏感，因為有石化業務，油價跌對化工生意有幫助，是日收3.175元，進帳1格。等機會，見中石化回到將近3元邊邊，喺低位收啲C輪博反彈，對象係熱門貨3862，9月尾夠鐘，輪價24仙，溢價5.2%，槓桿率13.2倍（有效7.3倍），引伸波幅25.9%。次熱門貨係3905，槓桿率着數啲，但壽命只長幾日，要畀多6.5個百分點，制唔過。
章盛