反曾亂港抗壽大行動，升級兼深化，土共及自由黨，公然不服主人壽爺在澳門對曾蔭權爵士進行黃金六秒大揸扒，認為曾爵士上台，即是階級鬥爭新動向及肥彭轉世靈童回朝，於是醞釀抗壽局部政變，密謀推出代表人物，「挑戰」曾爵士！
連日來，針對曾爵士嘅抹黑大行動，經已展開！有人摷出司長前御廚，策劃一場「大長今血淚大控訴」，亦有人言之鑿鑿，話經過土共大量黑函及小報告，終於成功令「中央」信服爵士黑夜口哨吹國歌，查實係對國歌不敬，對爵士嘅印象經已進入負面，隨時準備換馬！
有重量級人馬公開發炮，大罵特區政府協助本地商人屍爬打入大陸不力，矛頭直指政務司司長當撈曾！當撈絕不怠慢，沉着應戰，勞動到「幼曾」鬍鬚俊出面反擊，話港商屍爬速度慢，係大陸地方保護主義，以孖曾為首嘅特區政府，一早就盡力！
講開又講，屍爬不力，又關孖曾（大曾係曾慶紅，細曾係曾爵士，而幼曾就係以劍擊為強項嘅鬍鬚俊）乜事？港商一過深圳河，喺嗰便租舖、攞批文、申請水電三通一平，同埋枱底講數，冇一樣係以曾爵士為核心嘅特區政府權力管轄範圍，唔通叫特區政府搵個AO加兩個警察，傍住一個港商入東莞同佢通晒啲大陸波仔？商業行為，自己執生，咁都炮轟孖曾，直頭係屈得就屈，亦可見親中勢力對爵士嘅刻骨仇恨！孖曾政權冇協助港商屍爬北上，咁港區人大、政協代表，邊個又試過向喺大陸失蹤或受屈嘅港商港人，協助疏通，叫大陸佬放人？
特區政府管轄權不及深圳河以北，反為人大政協，個個都自稱有線直通江太祖壽爺，級別待遇隨時高過廣東省長，佢哋唔幫港商，反而旨意港英餘孽，係咪笑話？
今個復活節，風雲突變，土共等密謀將當撈監生釘死在十字架，並杜絕佢復活嘅可能性！不過正如八方一早指出：反曾蔭權，即是反曾慶紅、反胡錦濤、反華兼反共！是否會得逞呢？嘿，今次好睇咯！
傳真︰2623-9278
電郵︰[email protected]