早幾日我求大俠咪講過西甲聯勁旅皇家馬德里有興趣入股中超球會北京國安（北京現代），以三千萬元人民幣收購國安三至四成股權，估唔到呢單嘢咁快有跟進。據報經過一星期嘅接觸後，雙方談判順利，重簽定咗初步意向協議書，國安重會改名「皇馬國安」㖭！
國安有咁大支水喉射住，相信一定令其他中超球會羨慕不已，因為喺四月二日展開嘅新一屆中超𠵱家其實重好亂，財政狀況依然唔係幾好。據報，為咗吸引更多球迷入場，中超班霸之一嘅上海國際，已決定減票價五成，只售每張五十元人民幣，而且重會喺佢哋嘅球場外搞嘉年華，要一眾球星同球迷唱卡拉OK，務求搞好同球迷嘅關係。
據我求大俠所知，中超嘅球星一向都幾大鼻，今次要佢哋咁做，都咪話唔大犧牲；不過，所謂馬死落地行，為咗中超好而令自己嘅生計好，相信中超球星都會繼續親民。
大細威扮專家出書
威廉絲姐妹最近嘅風頭可能被一眾俄羅斯女網手蓋過，但佢哋靜極思動，出咗一本名為《生活、愛情與勝利的十大誡律》嘅書，對象係九至十二歲嘅女孩，俾理財同埋愛情貼士佢哋。雖然威廉絲姐妹緋聞唔多，但就話自己係愛情專家，重叫人唔好相信一見鍾情！信不信由你。
彭拿治有機戰熱刺
由阿仙奴外借到伯明翰嘅英格蘭年輕翼鋒彭拿治早前因醉酒駕駛而被停牌同埋被判監三個月，不過由於喺獄中表現良好，獲得提早釋放，但條件係要戴住電子晶片，以知道佢有冇違規。彭拿治提早獲釋，最開心嘅可以話係伯明翰，因佢可喺四月二日對熱刺場英超聯為球隊候命。
龍格保接死亡威脅
乜嘢叫做人怕出名、豬怕肥？睇啲世界級球星咪知囉！除咗一眾南美球星嘅媽媽成日俾人綁架之外，最新一單係阿仙奴嘅瑞典中場、CK御用內衣褲模特兒龍格保成日俾人跟蹤，重接到死亡威脅，要報警備案。咪睇龍格保好型好不羈咁，佢話都不知幾驚，梗係啦，命仔要緊喎！
羅馬或賣卡斯辛奴
羅馬會方日前宣布喺下星期約見所有要傾續約嘅球員，包括托迪、蒙迪拿同埋古菲，惟獨無預到卡斯辛奴，照咁睇好可能將呢個壞孩子賣走套現。卡斯辛奴野性難馴，無邊個管得佢掂；佢又剩番一年約，羅馬今夏唔賣佢隨時渣都無，反正有價有市，如果由我求大俠話事，實賣。