旺角波鞋街巧遇網上拍賣王「大隻唐」，十零度涼浸浸天氣下竟仍滿頭大汗，只因兩手抽着共二十幾對波鞋準備扔上eBay賣畀番鬼仔，咁辛苦仍笑口淫淫，估計從中獲利甚豐。大隻唐：「𠵱家做eBay已經冇以前咁好搵，好多零售同批發商都識得上去賣嘢，多個香爐多隻鬼，你明點解喇。eBay手續費最近又加價，同東隧一樣食水咁深，令好多賣家都轉場搵食；因加得減，eBay喺美國股價便應聲下跌。我最近亦轉玩香港Yahoo拍賣場，手續費全免，反應估唔到唔錯。
「唔怕講你聽，呢輪喺上面我賣Nike嗰條反種族歧視黑白手帶賣到開晒巷，因為香港冇乜人有貨。好多人誤會呢對黑白手帶係兩條獨立分開，其實正宗反種族歧視手帶係兩條連埋一齊，代表唔同膚色人種緊扣，你睇朗拿甸奴就見到喇！花園街班舖家好醒，即刻將Nike以前出嘅黑色同白色手帶Pack埋一齊賣，香港人未見過原裝正版，以為同朗拿甸奴戴緊嗰條冇乜分別，就即買嚟戴響應一下。不過冇乜所謂啦，最緊要有Heart，無論戴邊款手帶都一樣，不過幫襯我買正宗貨當然最好喇。」
主持人：大食Jack
八卦熱報：[email protected]