在今屆香港電影金像獎頒獎典禮的「最佳男主角」提名中，《旺角黑夜》的方中信憑其突破性的演出，被電影人一致看好是封帝大熱。不過網上賭盤卻是《新警察故事》的成龍最熱，看來影帝寶座應是方中信與成龍兩位戲中警察之爭。
到底今屆金像獎影帝寶座花落誰家，後日（二十七日）便知分曉，現時網上博彩公司易勝博雖然以成龍為大熱門，不過電影界人士普遍認為他在《新警察故事》中的表現不算有太大突破，反而剛在本周日憑《旺角黑夜》在內地「第五屆華語電影傳媒大獎」首奪影帝寶座的方中信，被一致看好將再得「最佳男主角」獎。
導演張堅庭表示看過方中信在《旺》片中的演出後，即認定對方有影帝相，他說：「方中信係一位好演員，可惜一直未遇到好戲畀佢發揮，今次佢喺《旺角黑夜》做嘅警察角色終於有發揮機會，佢將個角色掌握得好，所以我好睇好佢今年攞影帝。反而成龍個角色就冇乜突破，至於偉仔喺《2046》入面始終唔能夠脫穎而出，《功夫》嘅星仔戲份太少，表現難有發揮，但佢嘅導演功力就明顯有突破。」
而影評人Philip同樣對方中信情有獨鍾，認為他可穩奪「最佳男主角」獎，Philip說：「方中信做過咁多警察角色，但今次演技明顯好咗。」
Philip續說：「至於其他對手好似偉仔咁，我覺得佢突破唔到《花樣年華》嘅演出，而吳彥祖喺《旺角黑夜》入面點睇都唔似一個賊，欠缺說服力，周星馳自導自演嘅《功夫》就導好過演，至於成龍雖然有轉變，但突破程度始終唔及方中信。」
