華置大劉劉鑾雄，早排一次過標售中半山三個豪宅單位，禮拜一截標，噚日終於有結果，只有一個賣出，其餘收回。
成功售出嘅係帝景園一座三十七樓B室，二千二百五十六呎，成交價三千零八十萬，每呎一萬三千六百幾。個盤一共收到四支標，大家出價相當接近，最後當然係價高者得啦。今次大劉賣樓，賺到二百六十萬，有代理話賺得少。
單位係建萊銀主貨，大劉喺○四年三月，以二千八百二十萬買入，揸一年轉手，升值唔夠一成，升幅唔及同區豪宅，七除八扣，都唔係執好多。
不過，點都好過前業主建萊秦錦釗，九六年尾買入，喺金融風暴後，單位淪為負資產，俾銀主收番。
新鴻基地產喺機場禁區，擺檔設展覽館，推銷荃灣爵悅庭。新地有咁多地方唔揀，搞到入禁區咁刁鑽？
新地周國賢話，除咗標榜個盤近機場，吸納一批喺機場工作，或者經常出外公幹嘅準買家外，特別強調新地係首個發展商，同機場管理局合作，送出機場購物禮券畀買家，頭二百個買家，可以得到價值五千蚊嘅購物券。
呢個展覽館只會擺到四月六號，正當其他發展商為大批市民趁復活節長假外遊，示範單位欠缺人氣而發愁，爵悅庭正好吸引呢批外遊人士，喺等待上機嘅時候順道參觀。
新地會派出六至七個職員，即場介紹同派傳單，為爵悅庭全新一幢物業，喺四月底開盤鋪路。
至於唔外遊、留港消費嘅，就可以去元朗新元朗中心睇示範單位。
不斷與國際品牌搞合作嘅盈大，代表作薄扶林貝沙灣，喺售樓處經常舉辦國際時裝表演，貫徹物業嘅豪宅風範。今趟與國際著名美容品牌嬌蘭，同埋SPAChakra水療合作，喺貝沙灣第三期住宅會所，提供水療同埋美容服務。
負責貝沙灣銷售嘅顏金施話，成個第三期會所，佔地四萬呎，嬌蘭美容院佔三千呎。
呢個嚟自法國嘅美容品牌，全球有唔少旗艦店，喺亞洲區住宅搞大型美容院，就係第一次。
不過，會所明年中才啟用，住戶到時至可以享受呢項服務。
資深投資者黎永滔同埋羅家寶，本來諗住趁復活節假期，拆售銅鑼灣前總統餐廳，點知，突然提早開波，噚晚賣咗七成，套現差唔多兩億，同舊年買入價五千九百萬比較，賺兩倍有多。
呢個場取名銅鑼坊，喺謝斐道五一五號地下至一樓，大約萬六呎，間咗一百四十二個細舖。
代理美記講，已經賣出超過一百件，最貴嗰件梗係唯一嘅地舖，二百幾呎，由澳洲籍商人，用千一萬買入，四萬八蚊呎。
至於一樓最平一個四十六呎舖，就唔使一百萬；最貴嘅百六呎，賣五百幾萬。
電郵地址：[email protected]
