自從無綫劇集《皆大歡喜》播映完咗，無綫搵咗監製徐正康着手籌備新嘅處境喜劇，之前有消息話套新劇橋段似美國電視劇《色慾都巿》，而劇情同角色都有咗初步定案，馮仁昭八到監製徐正康會幫韓君婷、苑瓊丹、伍詠薇同滕麗名度身訂做角色。
韓君婷喺劇裏面開美容院，伍詠薇係一間公關公司嘅老闆，滕麗名係女警，苑瓊丹就扮堪輿師。佢哋同住喺一幢舊樓，四個人老友鬼鬼，重成日約埋去做按摩。當佢哋聚埋一齊時，就少不免會講女人經，好似辦公室、同性異性之間嘅鬥爭、減肥、鬥靚等，為求達到搞笑效果，佢哋嘅對話都幾尖酸抵死。
馮仁昭覺得幾個角色都好合乎現實情況，韓君婷早排係咁做纖體代言人，相信佢對美容公司都幾了解，而苑瓊丹好鍾意研究風水命理，佢扮堪輿師都幾啱，伍詠薇平日成日去Ball，所以由佢嚟扮公關公司嘅老闆都會似模似樣，至於而滕麗名喺劇集《陀槍師姐》裏面扮師姐，再演番女警就自然駕輕就熟啦！
黃佩霞前晚出席香水活動，佢話好開心同朋友夾份開嘅瑜伽中心，最近投資多一百萬美金，開多咗間二萬幾呎嘅新店，𠵱家夾埋有三間。提到早排有女仔喺健身中心嘅蒸氣房死咗，黃佩霞話佢教瑜伽會問晒學員嘅健康狀況，高溫瑜伽都係三十六或三十七度左右，對亞洲人係冇問題嘅，稍後鍾麗淇重會加入做教師㖭。
星皓電影前晚喺蘭桂坊搞咗個派對，畀啲導演、演員同片商聯誼吓，林嘉欣、盧巧音、星皓老闆王海峰、將會合作拍戲嘅任達華同有三藩市乳牛之稱嘅張聖瑩都有到場。任達華一見到馮仁昭就好開心咁騷佢手提電話上面個女張相，佢話稍後同張聖瑩合拍《陰冷之男》，重會有大膽演出喎。
吳卓羲前晚為佢主唱嘅《酒店風雲》主題曲喺將軍澳電視廣播城拍MV，重搵咗鍾嘉欣同司徒瑞祈客串，三個人糾纏喺一段三角戀中，鍾嘉欣重要着婚紗上陣，結果吳卓羲失戀收場，佢話現實中都未試過要同情敵拗手瓜，但讀書時就經常有女仔追佢，吳卓羲話：「啱咪做住朋友先，唔啱就唔好成日聯絡啦，其實我大個出嚟做嘢後都冇呢啲。」
關之琳日前同新歡霍建華、舊愛馬清偉夜蒲後，噚日下晝佢又出動，由司機接載佢去中環文華東方酒店，原來之之約咗三名女性朋友歎下午茶。不過佢到場唔夠五分鐘，舊愛黃家諾竟然咁啱喺酒店門外經過，問佢係咪約咗之之歎茶？佢只係擰擰頭就走咗，睇嚟佢兩個真係冇乜緣份。
