理想家居︰手繪實木家具繪出童話世界

童話世界令人嚮往；如童話故事般嘅圖案純潔無瑕，小朋友或者童心未泯嘅少女們一定愛到死！ArtDeco專營手繪家具，為實木家具、甚至家居牆壁繪上獨一無二嘅圖案，當中最受歡迎又最拿手嘅就係一系列童話角色及場景。想追尋綠野仙蹤、喺夢幻城堡中演繹睡公主一角，只要有夢想就可成真！

記者：江聰
攝影：陳智良
Model：Crystal、嘉嘉

形形色色兼備手繪圖案

玫瑰加雜花

中古武士

中世紀教堂

紅色獅子

黃色飛龍

圖案花款老少咸宜

ArtDeco手繪家具嘅圖案可以度身訂做，只要客人交出圖畫嘅樣辦，ArtDeco都會盡量跟足畫好再徵求客人意見才繪到家具上。客人除可以自行設計圖案外，ArtDeco亦有提供大量參考書籍，包括最受愛戴嘅童話人物、各式各樣嘅花朵圖案、甚至係野生動物如獅子老虎都有。圖案大小以至擺位都可以應客人要求，而且全程人手繪製，想擁有一間充滿童話色彩、幻想空間嘅部屋，又或者想同小朋友製造一間夢境般嘅房間都絕無問題。
除咗照顧小朋友及童心未泯嘅大朋友外，ArtDeco重製出一系列極具歐陸情懷嘅仿古家具，無論雕花、圓腳花邊線條都極有典雅感覺，能登大雅之堂。

■店內有大量參考書供客人選擇圖案，除童話故事外，不同構圖嘅花紋亦相當受歡迎。

■ArtDeco老闆Tony話手繪圖案家具受到不同年齡不同階層人士喜愛，全因為夠獨特夠搶眼，能令平凡單調嘅家居添上豐富色彩。

童話世界

$4,200
■衣櫃上畫滿天使圖案及花邊，留意櫃頂的雕花，極有心思。

枱：$4,300
椅：$900
■喺白色實木製嘅書枱上繪上清淡嘅花紋，簡單就是美！配上一Set嘅木椅更充滿少女情懷，不過木椅較硬，好睇唔好坐。

$4,900
■如果公主床係女仔嘅最愛，咁呢張十足堡壘圍牆一樣嘅兒童床，就一定係小男孩嘅首選。

$880
■呢張造型咁特別嘅木椅，會唔會令人有住喺快樂王國城堡嘅感覺呢？

家具種類選擇多

圖案可自訂，家具種類選擇亦多，差不多全屋嘅家具種類都有齊。包括鞋櫃、衣櫃、睡床、書枱、飯枱等，可以喺不同家具繪上不同圖案。另外由家具種類同形狀，一樣可以度身訂做，如堡壘形嘅床、公主床都有多至數十款樣辦選擇，配合不同圖案，可變性極高，輕而易舉就可以建造出一所獨一無二嘅夢幻家居。

歐陸風情

■咁大本書其實分別係一Set三「本」嘅小鞋櫃（$1,800）及直立嘅大鞋櫃（$1,680），精緻度滿分，用來收埋鞋子，靚晒！

1枱4椅：$6,800
■同樣係手繪圖案，充滿復古風味嘅餐枱及餐椅，枱上椅上嘅花紋有不同選擇。

$5,800
■唔想屋企咁稚氣，ArtDeco有較成熟嘅歐洲仿古家具可以選購，底部花邊及櫃門上嘅雕花花紋，都極為典雅。

■唔只童話角色，就算想房間變成原野森林，與獅子老虎同睡都冇問題。

■雖然家具全部喺國內訂製，但全部圖案都係人手繪製，卻絕不是馬虎貨色。

製造海景田園景觀

ArtDeco除售賣家具，重會免費幫客人作室內設計，最神奇就係可以喺一間四面牆嘅房間加上「窗口」，而且無論你係住喺舊唐樓或者繁華鬧市，一樣可以擁有海景田園嘅景觀。加裝窗戶、變化景觀，ArtDeco唔係識得變魔術，只係將手繪圖案變成壁畫，在牆壁繪上開揚海景、青綠田園嘅圖畫，令室內環境更多色彩，投入夢境中嘅幻想世界。

夢幻布景

$2,800
■窗外擁有歐陸小村莊嘅風景，係喺香港不能實現嘅夢想，有咗呢個窗框連壁畫嘅布景，就可以夢想成真。

■ArtDeco提供上門畫壁畫服務，畫一幅歐洲海岸嘅風景壁畫（$8,000），需時大概要兩日，價錢由所佔面積及圖畫嘅複雜程度而定。

ArtDeco

地址：跑馬地黃竹坑道79號地下
電話：25069230
營業時間：星期一至六10:30am-7:30pm，星期日及公眾假期12:00nn-7:30pm