好友丟盔棄甲，恒指散172點，守住一萬三千六，期指則收一萬三千六以下。個市要復活，暫時好難，但間中彈番些少，仍然有機會。藝高人膽大者，如果有運氣相助，都有可能喺C輪身上搵餐晏仔，但亦有機會輸個大餐。要有心理準備，幾十倍槓桿率嘅窩輪，無論係C抑或P，隨時上落一二十個巴仙，而只不過係喺正股上落1-1.5%嘅過程中出現。
恒指C輪：個市唔妥，自然係恒指P輪天下。恒指收報13603，距離1月份低位（最低13321，最低收市位13387）相差逾200點。有P輪在手者，可以斬邊留邊，先將部份利潤暖袋。冇P輪在手者，喺輪價急升後至上車，蝕咗先機，唔係好諗得過，無貨一身輕算數。炒輪幾時都要有兩手準備，恒指如果下試1月低位或接近1月低位，可以諗吓趁低酌量收啲C輪，博技術反彈搵錢，主角係3795，7月尾到期，輪價14.2仙，溢價3%，槓桿率22.3倍（有效12.5倍），引伸波幅17.1%。
太AC輪：太A（019）冇咗3.5%，收62.75元，太AC輪普遍散20%以上。最熱門嘅3528，成交金額逾7球，收40仙。吼住正股再落到60元邊邊，買3528博反彈。隻輪11月尾到期，溢價6.6%，槓桿率15.7倍（有效7.9倍），引伸波幅21.5%。正股唔再跌，則唔買輪。太A冇P輪，冇得做淡嗰便。
中銀C輪：中銀（2388）多賺50%，派成績表後PE跌到12.7倍，表面上唔貴，不過業績靚係因為物業重估增值同埋撥備減少，撥備前經營盈利倒退11%。末期息0.395元則算唔錯。咪期望過高，股價作為不大，C輪冇隻諗得過。
章盛