《殘酷一叮》令不少參賽者一夜成名，如有「勁舞馬勒當拿」之稱的印籍台主喬保羅現已唱出名堂，原來他任職懲教署，過往便不時在聯歡會上表演助興。而有機會翻叮的「翻版刀郎」龔萬志，因終日在家唱卡拉OK弄得家嘈屋閉，太太遂索性代他排隊報名參賽。
在《殘酷一叮》中，憑一曲「愛情陷阱」成為兩屆台主的喬保羅，雖然擁有印度血統，但他日前接受訪問時，卻堅稱自己是百分百的香港人，喬保羅說：「因為我本身有好多香港朋友，我基本上都當咗自己係香港人，直頭入鄉隨俗。」
目前任職懲教署的喬保羅，對於本身的工作坦言滿意及覺得極具挑戰性，問到他為何會參加該比賽時，他說：「起初係我朋友幫我報名，因為我成日都喺朋友啲宴會度帶歡樂畀大家，我又無乜所謂，但我冇諗過可以做台主，我預咗十秒內會俾評判叮走。」
喬保羅揚言參加《殘酷一叮》後，全港四分一的懲教署職員都認得他，喬保羅又說：「比賽對手都好強，我嘅歌藝又係有限公司，所以要喺造型上花少少工夫。」
另外，有機會翻叮再參賽的三十五歲「翻版刀郎」龔萬志，他接受訪問時表示參加比賽是獲太太支持，龔萬志說：「我鍾意唱歌，成日喺屋企唱卡拉OK，揀親都係高音嘅歌，我老婆話我成日鬼殺咁嘈，一知道有《殘酷一叮》，就走去幫我排隊，如果唔係我老婆去排隊，我都唔會去參加！不過，我真係好鍾意唱歌，屋企成副卡拉OK裝備，重幫自己錄埋歌㖭！」
採訪、攝影：王崇穎、楊潔雯
