美國加息，外圍股市轉弱，港股甫開即裂口大跌，恒指一度下跌超過200點，收13603，跌172點，成交就大增到223億元。期指跌破13600關口，收報13565，低水38點，成交合約亦急增。
港股形勢轉壞，3條短期平均線都已明顯跌穿，且有形成複式頂部形態之勢，頸線在13321水平。本欄早前講過，大市雖然利淡消息充斥，包括息口趨升、抽資同特首選舉的政治爭拗，但大戶似乎並非睇得好淡，個人認為大戶正在收緊貨，而呢個窄幅上落期（13500至14300之間）重會維持一段長時間，等大戶收集完成，大市就會飆升。
恒指在13500至13300區域的支持力，相信好快就會受到考驗。上月底，港股出現強力反彈，但始終要回落，主要係調整時間未夠，由去年12月初的高位開始，大市已調整接近4個月，時間應已差唔多，唔排除大市會在4月中旬見底，而今次亦好大機會係最後一跌。
中石化冠德（934）04年度（12月結）業績有平穩增長，營業額84.4億元，升9.7%，獲利1.54億元，升11.1%，每股盈利14.9仙，末期息1.5仙，全年合計3仙。業績宣布後，冠德股價回落，噚日收1.13元，往績PE7.6倍，息率2.65厘，短期內可能重要試底。
冠德業務主要分3部份，分別為原油、石油及石化產品貿易，石油產品分銷，以及原油碼頭服務。期內油站業務「捱打」，令到盈利表現低於市場預期。
由於油價飆升，成品油出廠價居高不下，但零售價未有相應大幅調高，油站邊際利潤縮減，去年油站銷售各類油品共45萬噸，營業額約15.1億元，上升24.8%，但經營利潤降低37.4%。
貿易業務則有理想表現，期內銷售收入66.1億元，上升7%，經營利潤增長1.2倍；至於原油碼頭營運負荷明顯增加，期內輸送原油743萬噸，升7.5%，營業額3.3億元，升3.4%，經營利潤2.1億元，升3.1%。
展望05年，冠德盈利料仍會有微幅增長，大市短期勢弱，股價若回落到半年來低位的1.05元水平，可入市，待1.2元回吐，玩波幅。
郭兆誠